مصر هتبقي غول سياحي في العالم والمنطقة وهتكون المقصد رقم واحد للشركات السياحية العالمية بالمنطقة.. ازاي دا هيحصل وايه المفاجأة اللي قالتها وكالات المال والاقتصاد العالمية عن السياحة في مصر وايه سر ال20 مليار دولار اللي في الطريق.

مصر مش محتاجة كلام انها أعرق دولة في العالم وحضارتها اقدم حضارة وعندها اكتر من تلت اثار العالم لوحدها ودا غير أن فيها تنوع سياحي مش موجود عند اي دولة من اعتدال الطقس والمحميات الطبيعية والطبيعة الخلابة وسياحه العلاج والسفاري والترفيه والسياحة الدينية والثقافية وانواع كتير جدا من السياحة لكن للاسف كل الإمكانيات دي ماكنتش مستغلة بالشكل المثالي وكان فيه إهمال في مناطق أثرية كتير وحصل تعديات على مناطق تانية وغير أن مكانش فيه خطط واضحة ولا ابتكار أو فكر مختلف لاستغلال المناطق الأثرية بشكل أفضل لغاية وصول الرئيس السيسي للحكم وقرر أن مصر تبقي على قدر تاريخها وعظمتها.

في الشهور الاولى من حكم الرئيس السيسي كلف الحكومة بخطة شاملة لإنقاذ وترميم المناطق الأثرية في كل أنحاء مصر وتنفيذ مشروعات لعرض الكنوز والاثار المصرية بما يليق بيها وفعلا لاول مرة نشوف مشروعات وخطط كانت حديث العالم بداية من موكب المومياوات الملكية وافتتاح متحف الحضارة وإعادة الحياة لطريق الكباش بالأقصر وشفنا العظمة في المتحف المصري الكبير وغيرها من آلاف المشروعات اللي رجعت للحضارة المصرية بريقها.

مع تطوير المناطق الأثرية بالتزامن مع خطط التنمية في كل المجالات وخاصة الطرق والمحاور ووسائل النقل الحديثة والتطوير الرقمي والاستقرار طبعا السياحة المصرية قدرت تسترد وضعها وبدأت تنور في العالم وحققت في قفزات تاريخية وحتى في سنة الأزمات العالمية والإقليمية 2024  قطاع السياحة عامل موسم استثنائي.

كل اللي قلناه دا مش مهم ..الأهم بقي اللي اتقال في التوقعات العالمية عن مستقبل السياحة في مصر واللي هتكون البريمو في حوض البحر المتوسط والشرق الأوسط ومثلا مؤسسة "فيتش سوليوشنز" التابعة لمؤسسة فيتش للتصنيف الائتماني رفعت سقف توقعاتها لإيرادات مصر من السياحة في عام 2025 وقالت إن إيرادات مصر من السياحة هتشهد نمو قوي في 2025 لتحقق نحو 17.4 مليار دولار مقابل 16.3 مليار مقدرة في عام 2024.

الوكالة الدولية اتوقعت  وصول عائدات السياحة المصرية  إلى 18.4 مليار دولار في 2026 وهتوصل 19.2 مليار بنهاية 2027 وقالت انها هتوصل الي 20 مليار دولار في 2028 والأهم أن مؤشر الإيرادات مستمر في الصعود يعني هيكون فيه ارتفاع مستمر في إيرادات الدولار من السياحة ودا غير القطاعات التانية اللي بتستفاد من انتعاش حركة السياحة واللي بتعتبر قاطرة التنمية في أي بلد لأنها بتشغل مئات الصناعات التانية ويتوفر ملايين فرص العمل الغير مباشرة.

طيب ايه اللي خلى فيتش تأكد زيادة الإيرادات السياحية في مصر ؟
الحقيقة في أسباب كتير منها تحسن الإنفاق الاستهلاكي في أوروبا والشرق الأوسط وشمال أفريقيا سيؤدي إلى نمو الإيرادات لكل زائر وإن سوق السياحة في مصر راسخة وتعتبر وجهة شعبية للمسافرين من أوروبا لا سيما خلال فترة الإجازات والمقصد المصري يمتلك تنوعا فريدا ومقومات سياحية هائلة سواء كانت شاطئية أو ثقافية بالإضافة إلى تواجد 7 مواقع مصرية أثرية مسجلة على قائمة يونسكو للتراث العالمي.