لو إنت شاب لسه بتبدأ حياتك وبتسأل نفسك إمتى هقدر أمتلك شقتي وأرتاح من الإيجارات؟ وهل البنوك فعلاً ممكن تساعدني ولا الموضوع مجرد كلام وخلاص؟ وإيه قصة مبادرة التمويل العقاري اللي كل الناس بتتكلم عنها؟.. لو الأسئلة دي بتدور في بالك.. تعالى أقولك إزاى بنوك مصر بتدعم الشباب وبتوفرلهم التمويل المطلوب لشراء شقة العمر.
من فترة طويلة وموضوع امتلاك الشباب لمساكنهم كان بيعتبر شبه حلم صعب.. بسبب ارتفاع الأسعار وصعوبة الشروط وضيق الإمكانيات.. وكل ده كان بيخلي الموضوع بعيد عن متناول ناس كتير.. لكن.. مع مبادرة التمويل العقاري اللي أطلقتها الحكومة المصرية بالتعاون مع البنك المركزي الحلم ده بدأ يتحول لحقيقة.
و خليني أقولك النهارده دور البنوك المصرية في المبادرة دي، وإزاي بتسهل على الشباب امتلاك شقق او بيوت ؟ وإزاي ممكن تستفيد منها لو أنت فعلاً عايز تبدأ مشوار حياتك بشقة تمليك ؟
الموضوع ببساطة إن الحكومة أطلقت مبادرة بتستهدف فئات مختلفة من الشباب ومحدودي ومتوسطي الدخل.. البنوك هنا بتدخل كداعم رئيسي للمبادرة.
جد هيسأل ويقول إزاي دع بيحصل؟
بص يا سيدي .. أول حاجة.. المبادرة بتوفر قروض تمويل عقاري بفوايد مدعومة جداً.. الفايدة بتوصل لـ3% متناقصة في بعض الفئات وده رقم قليل جداً مقارنة بأي قرض تاني موجود.. ومدة السداد بتوصل لحد 30 سنة.. يعني تقدر تقسط المبلغ براحتك وبدون ضغط.
باختصار.. بدل ما تقعد تدفع إيجارات طول عمرك من غير ما تمتلك حاجة الفلوس اللي كنت هتدفعها في الإيجار ممكن تكون هي نفسها قسط شقتك الجديدة، و خليني أقولك الشروط اللي البنوك بتحطها عشان تستفيد.
لازم طبعا تكون مصري الجنسية.. ودخلك الشهري يكون متناسب مع الفئة اللي بتقدم عليها.. يعني لو من محدودي الدخل الحد الأقصى للدخل الشهري 4500 جنيه للأعزب و6000 جنيه للأسرة بتدفع مقدم بسيط بيبدأ من 10% من قيمة الوحدة.
والمفاجأة إن الوحدات كمان مش لازم تكون جديدة.. ممكن تختار شقة في مشاريع إسكان اجتماعي أو حتى وحدة قديمة بشرط تكون حالتها كويسة ومطابقة للشروط.
طب إزاي البنوك بتساعدك؟
البنوك المصرية بتتنافس في توفير التمويل العقاري وكل بنك عنده نظام خاص بيه لتسهيل الإجراءات.. مثلاً بنك مصر والبنك الأهلي المصري بيقدموا إجراءات بسيطة جداً وتقدر تقدم في فروعهم المنتشرة في كل حتة.. بنك القاهرة بيوفر استشارات مالية عشان يشرحلك كل حاجة وكمان بيخلص لك الورق بسرعة وفيه بنوك خاصة زي بنك التعمير والإسكان اللي بيدعم الشباب بشكل قوي جداً في المبادرة.
طيب إيه اللي يخليك تفكر في المبادرة دي؟
فيه حاجات كتيرة تخليك تفكر فى المبادرة دي .. بدل ما فلوسك بتروح للإيجارات اللي ملهاش نهاية استثمرها في شقتك.. وقدامك 30 سنة سداد مش موجودة في أي نظام تاني و تخيل فايدة 3%؟ ده دعم حقيقي للشباب.
0 تعليق