يا ترى الدهب رايح على فين في الفترة الجاية، هل هنشوف ارتفاع جديد في الأسعار العالمية والمحلية ولا هيحصل تثبيت ولا انخفاض، وإيه هو أفضل وقت للشراء في السنة الجديدة 2025.

في الأيام الأخيرة، أسعار الدهب ارتفعت بشكل كبير، والموضوع كانت سببه هو قرارات الرئيس الأمريكي دونالد ترامب بفرض رسوم جمركية على عدد من الدول زي الصين وكندا، ورغم إن القرار ده تجاري بحت إلا أنه أثر بشكل مباشر على أسعار الدهب.. طب يا ترى حصل ايه للأسعار؟

بص يا سيدي، أسعار الدهب ارتفعت بشكل كبير، وسجلت الأونصة 2820 دولار عالميا، وفي مصر الدهب قرب يوصل ل 4 آلاف جينه لجرام ال 21، عشان كده الخبراء وكمان مؤسسة جولد بيليون المتخصصة في الدهب، اتوقعت إن أسعار الدهب خلال الفترة الجاية  هتتحرك تاني وهيرتفع اكتر.

وجولد بيلون، قالت، إن الذهب عيار 21 بدأ تداولاته في مصر عند مستوى 3910 جنيهات للجرام، واتوقعت كمان إن سوق الدهب المحلي شهد زيادة في المعروض في ظل توجه المواطنين لعليات البيع دلوقتي عشان يقدروا يوفروا السيولة النقدية لاحتياجاتهم، بجانب انهم يستفيدوا من سعر الدهب المرتفع، وده حصل بعد ما فشل المعدن الأصفر في الاستفادة من السيولة النقدية الناتجة عن استحقاق شهادات البنوك واللي بدأت مع بداية العام.

أما بالنسبة لحركة الدهب العالمي في الأسبوع ده، فهيكون لها تأثير مباشر أيضا على حركة الدهب المحلي في مصر، وده ممكن يسبب حالة من التذبذب في حركة المعدن النفيس بسبب تغيرات سعر صرف الدولار.

ولو حضرتك من محبي الادخار وعايز تشتري دهب، فنقدر نقولك إن الدهب هو الحل، لانه الملاذ الآمن للاستثمار والادخار، وبيظل الاستثمار الأكثر انتشارًا بين الناس العادية وكمان المستثمرين، لأنه مش بيخسر بل بالعكس بيحقق مكاسب كل فترة، وكمان مضمون يعني تقدر تبيعه في أي وقت وماتخسرس ولا مليم فيه.

برضو، الدهب بيحقق أرباح كبيرة في فترات قصيرة، عشان كده الاتجاه للدهب سواء للادخار أو الاستثمار فيه هو أفضل طريقة، لأنه الاستثمار الأكثر أمانًا على المدى القصير، والأفضل على المدى الطويل.

ولو ناوي تشتري دهب دلوقتي، فلازم تشتري من أماكن أو تجار موثوق فيها ومعتمدين، كمان لازك تاخد فواتير رسمية فيها كل التفاصيل الخاصة بالمشغولات الذهبية عشان تضمن الجودة والمصدر، أو مثلا الفواتير تكون فيها تفاصيل العملات الدهبية اللي حضرتك هتشتريها.

وحاليا، السبايك والجنيه الدهب، هي من أكثر الطرق أمانًا للاستثمار في الدهب، لأن السبايك الدهب بتقدر تحفاظ على القيمة  بتاعتها رغم تقلبات السوق، وبتتوفر كمان بأوزان مختلفة، بداية من وزن 1 جرام و5 جرام، وكمان ممكن تشتري السبايك الدهب بأوزان كبيرة زي 10 جرام أو 50 جرام، كمان الجنيه الدهب، بيعتبر من بين أفضل طرق الاستثمار في الدهب، وبيمثل فرصة كبيرة لتحقيق أرباح.

ولو نويت تشتري، فهنقولك على شوية نصايح، واللي أولها إنك تشتري من تاجر مضمون، وده مايمنعش انك تتأكد إن الدهب اللي هتاخده أصلي ولا فالصو، وكمان لازم تعمل اختبار  بسيط، وهو الفحص البصري، وركز إن الدهب الحقيقي فيه ختم بيحدد القيراط، مثلا زي 10K، 14K، 18K، 24K، كمان ركز على نقاء الدهب ولمعانه.