الفترة اللي جاية هتكون فيه اخبار هتزعل ناس كتيرة بخصوص اسعار البنزين والسولار، خصوصا أنه هيتم رفع الدعم بشكل نهائي.. ياتري امتي الكلام ده هيحصل أمتي.. والاسعار هتوصل لكام؟

امبارح كان في مؤتمر مهم لرئيس مجلس الوزراء الدكتور مصطفي مدبولي واللي عقده بعد الاجتماع الأسبوعي للحكومة واتكلم فيه عن حاجات كتيرة خاصة بالشغل الدولي والمحلي وخطة الحكومة لتوفير السلع واتاحتها للمواطنين وكمان استعدادات الدولة لطرح 400 الف شقة إسكان اجتماعي لمحدودي ومتوسطي الدخل واللي هيتم طرحهم بعد أجازة عيد الفطر المبارك، واجراءات أماكن التقديم، وكمان اتكلم علي منظومة الدعم وخطة الوزارة لرفع الدعم عن المواد البترولية ودعم البنزين والسولار وأنبوبة البوتاجاز.

طيب اية حكاية رفع الدعم عن البنزين والسولار وامتي الكلام ده هيتم؟.

في شهر ابريل اللي جاي لجنة تسعير المواد البترولية هتعقد اجتماع مهم لمناقشة الأسعار الجديدة للمحروقات في مصر،  وطبعا ابز انواع المحروقات دي هما اسعار النبنزين والسولار والغاز الطبيعي وانبوبة البوتاجاز، والأكيد ان القرار اللي هيخرج عن الأجتماع هيكون تحريك الأسعار والتحريك ده هيكون بنسبة كبيرة من ارقام بسيطة زي ما حصل في القرارات اللي خرجت من اللجنة في الأوقات اللي قبل كده .

سبب الزيادة الجديدة اللي هتحصل في اسعار البنزين والسولار في مصر هو البنود الصعبة لصندوق النقد الدولي واللي الحكومة اتفقت عليها مع الصندوق، واللي اغلبها بيتعلق برفع الدعم عن السلع والخدمات اللي بتقدمها الحكومة للمواطنين خصوصا دعم المواد البترولية والكهرباء ورغيف العيش.

الزيادة الجديدة اللي هتحصل في اسعار البنزين والسولار هتكون سببها الشريحة الرابعة اللي صندوق النقد الدولي اعتمد صرفها لمصر من كام ساعة واللي هتوصل لـ1.2 مليار دولار، ودي من القرض اللي مصر حصلت علي موافقته في مارس 2024 واللي بتوصل قيمته لـ8 مليار دولار، والحكومة هتبدأ من دلوقتي تنفذ شروط صندوق النقد الدولي علشان تصرف باقي شرائح القرض، وميكونش في تأخير تاني في الصرف زي ما حصل في الشريحة الرابعة الحالية واللي اتاخرت بشكل كبير جدا عن معياد صرفها اللي كان محدد في وقت سابق، وده بسبب تاخر الحكومة في تنفيذ شروط صندوق النقد وتاجيل الحكومة قرارات رفع الدعم عن السلع والخدمات اللي بتقدمها الحكومة للمواطنين لمدة 6 شهور كاملة بسبب الظروف الاقتصادية اللي بتمر بيها مصر واللي كانت ناتجة بسبب التوترات الجيوسياسية اللي موجودة في المنطقة العربية.

الخطة الحكومية لرفع الدعم بتتضمن رفع الدعم عن المواد البترولية وخصوصا البنزين والسولار بنهاية 2025، وبالتالي القرار الأكيد اللي هيصدر عن لجنة تسعير المواد البترولية هيكون تحريك للأسعار، وقبل نهاية السنة دي هتكون في تحريك تاني للاسعار خصوصا أن لجنة تسعير المواد البترولية بتعقد اجتماعتها كل 3 شهور، وبالتالي هيكون في رفع جديد في الأسعار وهيكون معاه رفع الدعم بشكل نهائي عن البنزين والسولار.