مصر حاليا بتنفذ مشروع سياحي بمنطقة الأهرامات والمتحف المصري الكبير هيؤدي السياحة المصرية في حته تانية خالص.. ياتري اية هو المشروع ده.. ومصر مستهدفة منه اية.. وليه الحكومة اختارت المنطقة دي بالذات.

من يوم ما الحكومة فكرت في تشييد حاجة اسمها المتحف المصري الكبير في ميدان الرماية بالجيزة، والدولة بترسم لتحويل المنطقة دي لمنطقة سياحية فريدة من نوعها خصوصا أن فيها منطقة منطقة آثرية من أهم الأثار في العالم وبتعد واحدة من عجائب الدنيا السبع وهيا الأهرامات، واللي بتحظي بقبول ورغبة كبير عند السائحين من جميع دول العالم علشان يشوفوا العظمة اللي المصريين القدماء عملوها، واللي لحد اللحظة دي العلماء مش قادرين يتوصلوا لاسرار بنائها .

طيب اية المشروع اللي بتعمله الدولة بمحيط المنطقة الاثرية بالأهرامات؟.

المتحف المصري الكبير واللي خلاص هيخرج للنور وهيكون مفتوح للزيارة قدام كل الناس وبكل قاعاته وبكامل القطع الآثرية المعروضة فيه بداية من 3 يوليو اللي جاي، واللي هيكون يوم الافتتاح الرسمي للمتحف واللي هيحضره عدد كبير من قادة وملوك ورؤوساء ورؤساء حكومات وعدد كبير من مشاهير العالم، خصوصا أن الإفتتاح ده مش هيكون يوم ولا اتنين، لا ده هيوصل لأكثر من 4 أيام وهتكون كل يوم فاعليات مختلفة عن اليوم اللي قبلها.

الحكومة بتستهدف من فتح المتحف المصري الكبير استقبال اكثر من 15 الف زائر يومي، وكمان السائحين دول هيقدروا يدخلوا الأهرمات عن طريق جسر مشاة لدولة عملته لربط المتحف المصري الكبير بالمنطقة الآثرية بالأهرامات، وده بعد ما حصل فيها تطوير كبير في الخدمات السياحية اللي الدولة بتقدمها للسائحين هناك.

الخطة اللي حطتها وزارة السياحة واللي بتستهدف استقبال 15 الف زائر يومي طبعا هيحتاجوا عدد كبير من الفنادق علشان يقعدوا فيها، وبالتالي الدولة حاليا حطت خطة لتطوير المنطقة الموجودة من مطار سفنكس واللي بيتم تشغيله علشان يستقبل الرحلات السياحية اللي جاية لزيارة الأهرامات والمتحف المصري الكبير وكمان منطقة سقارة، والمخطط بيمشل تجهيز عدد كبير من الفنادق والمناطق الترفهية والسياحية لاستقبال الزائرين والسائحين.

الخطة اللي حطتها الحكومة لتطوير المنطقة الممتدة من مطار سفنكس ولحد مشروع المتحف المصري الكبير لحد المنطقة الأثرية بسقارة، تضمنت طرحها علي القطاع الخاص للدخول وبدء بناء الفنادق والبنية التحتية المطلوبة فيها، وفعلا في عدد كبير من شركات القطاع الخاص دخلت في المنطقة اهم صندوق أبوظبي للتنمية واللي اطلق مشروع سوفيتل ليچند بيراميدز الجيزة واللي هيكون واحد من فئات الفنادق 5 نجوم وهتوصل التكلفة الأجمالية له لأكثر من 120 مليون دولار ، وهيضم اكثر 302 غرفة فاخرة مجهزة بأحدث الخدمات، ده غير مجموعة من المطاعم العالمية والمرافق الترفيهية وده في اطار الخطة اللي شغاله عليها المنطقة لتطوير وتقديم الخدمات السياحية الترفهية للزائرين.