ساعات قليلة ووزارة الإسكان هتعلن نتيجة سكن كل المصريين 5، وطبعا هيكون في ناس معترضة أنها اسمها مجاش في القرعة.. ياتري ايه الخطوات اللي المفروض الناس تعملها لو عايزة تتظلم من القرعة.. وامتي هيقدروا يسحبوا رد مقدمات جدية الحجز.

الإسكان الاجتماعي واحدة من أهم مشاريع الإسكان اللي الدولة شغالة عليها في الوقت، واللي حصل عليها إقبال كبير جدا من الناس، وده اللي اثبتته تجربة الإعلان اللي فات لسكن لكل المصريين 5 واللي حصل عليها اقبال كبير جدا من الناس قدام مكاتب البريد لشراء كراسات الشروط، وخصوصا أن وصل عدد الناس اللي اشتروا الكراسات لـ 762 ألف مواطن، سدد منهم 589 ألف مواطن مقدمات جدية الحجز واللي وصلت لـ20 الف جنية للشقق السكنية في المحافظات و 30 الف جنية للشقق السكنية في المدن الجديدة، وسجل منهم علي الموقع الإلكتروني للصندوق 571 ألف مواطن.

طيب امتي وزارة الإسكان هتعلن نتيجة شقق الإسكان الإجتماعي؟.
وزارة الإسكان والمرافق العمرانية قالت أنه هتعلن نتيجة الاعلان الـ18 لسكن لكل المصريين 5 بكرة الثلاثاء، والوزارة هترسل رسائل نصية SMS من خلال رقم الهاتف اللي المواطن سجله في البيانات اللي سجلها على الموقع الإلكتروني واللي هتتضمن موقف الطلب المقدم سواء بالانطباق أو عدم الانطباق، والخطوات اللي واجب عليه اتباعها في الفترات اللي جاية في حالة الفوز بالقرعة أو عدم الفوز فيها.

أما بقي الناس اللي بتسال علي خطوات التظلم علي نتيجة قرعة الإسكان الاجتماعي، فالوزارة قالت أنه هتفتح باب التظلمات للمواطنين غير المنطبق عليهم الشروط ضمن الإعلان لمدة شهر كامل والفترة بتاع التظلمات هتكون خلال الفترة من ٢٣ مارس الحالي إلى ٢٤ إبريل اللي جاي، ودي كفرصة أخيرة من الوزارة لاستكمال المستندات المطلوبة وتصحيح موقفهم علشان الوزارة تحفظ حقهم واستمرارهم في الإعلان.

صندوق الإسكان الاجتماعي قال أنه هيتم إخطار المواطنين غير المنطبق عليهم شروط الإعلان بعد انتهاء فترة التظلمات بسحب المبالغ المسددة بالبريد خلال 14 يوم من تاريخ إعلانه بالرفض، وده هيكون في أطار الوحدات المتاحة بكل مدينة وترتيب أولويات العملاء المنطبق عليهم الشروط وفقاً للمعايير المعتمدة من رئاسة مجلس الوزراء واللي تم ذكرها بكراسة الشروط، ويتم إخطار المواطنين اللي هم خارج الأولوية بسحب المبالغ المسددة بالبريد خلال 30 يوم من تاريخ إعلانهم.