إيه اللي هيحصل لو فجأة فوائد الشهادات البنكية مرتفعة العائد نزلت.. هتعمل إيه بفلوسك لو الشهادة اللي كنت مستني عائدها كل شهر بقت أقل من المتوقع.. وهل فعلاً البنوك هتسيبك كده من غير حلول.

الشهادات مرتفعة العائد.. زي اللي وصلت فايدتها 27% و30% السنة اللي فاتت.. كانت حلم أي حد بيدور على دخل ثابت ومضمون.. بس دلوقتي.. مع تراجع التضخم واستعداد البنك المركزي لخفض الفايدة.. الدنيا هتتغير.. البنوك زي الأهلي ومصر.. اللي جمّعت سيولة ضخمة من الشهادات دي.. بقت بتفكر تقلل العائد عشان تتماشى مع الوضع الجديد.. يعني لو عندك شهادة هتستحق قريب.. أو بتفكر تجددها.. لازم تبقى عينك مفتوحة على البدائل.. مش كل الناس هتهرب من الشهادات.. لكن اللي بيدور على مكاسب أكبر هيلاقي خيارات تانية تستاهل التجربة.

أول بديل.. وده ملك الملاذات الآمنة.. هو الدهب..

بص يا سيدي.. الدهب مش جديد على حد.. لكن اللي جديد إن سعره بقى طالع زي الصاروخ .. تخيل إن الأونصة وصلت فوق 3000 دولار دلوقتي في مارس 2025.. والسبب.. القلق الاقتصادي العالمي.. الحروب التجارية.. والتوترات في الشرق الأوسط..

وفي مصر الدهب كمان بيطلع زي الصاروخ بسبب التضخم اللي لسه موجود.. حتى لو قلّ شوية.. اللي بيخلّي الدهب مغري إنه بيحافظ على قيمة فلوسك على المدى الطويل.. وكمان دلوقتي فيه صناديق استثمار في الدهب.. يعني مش لازم تشتري سبيكة وتخبيها تحت المرتبة.. ممكن تستثمر فيه بسهولة وبأمان.. بس عيبه.. سعره عالي جداً دلوقتي.. يعني لو فلوسك مش كتير.. ممكن تلاقي نفسك محتاج تشتري حاجة أصغر أو تفكر في حاجة تانية.

تاني بديل.. وده العملاق اللي محدش يقدر ينكر قوته.. العقارات.. العقار في مصر بيعتبر الرهان الرابح دايماً.. ليه.. عشان قيمته بتتضاعف كل سنة بمعدلات أكبر من التضخم.. يعني لو اشتريت شقة أو حتى قطعة أرض دلوقتي.. بعد سنة أو اتنين ممكن تبيعها بضعف السعر أو تاجرها وتكسب دخل ثابت.. الشركات العقارية كمان بتقدم عروض قوية وتسهيلات في السداد.. والسوق مليان مشروعات جديدة في كل حتة.. من العاصمة الإدارية للساحل الشمالي.. اللي بيخلّي العقار جذاب كمان إنه بيستوعب سيولة كبيرة.. يعني لو عندك استحقاق شهادة بملايين.. ممكن تحولها لأصل عقاري.. بس المشكلة.. لو احتجت تبيع بسرعة.. هتتعب شوية عشان السوق مش دايماً بيبقى سريع.. وكمان الأسعار دلوقتي مرتفعة.. فمحتاج تكون عندك راس مال كويس عشان تدخل اللعبة دي.

تالت بديل.. وده اللي بيحبوا المغامرة ممكن يجرّبوه.. البورصة المصرية.. لو بصيت على سوق الأسهم دلوقتي.. هتلاقي فرص كتير بتطلع.. خصوصاً مع الأخبار الإيجابية زي تراجع الدين وتحسن مؤشرات الاقتصاد.. البورصة بتقدم تنوع رهيب.. يعني ممكن تستثمر في أسهم شركات عقارية.. تكنولوجيا.. أو حتى بنوك.. اللي بيميزها إنها بتديك سيولة عالية.. يعني تقدر تبيع وتشتري في أي وقت.. وكمان الحكومة بتفكر تلغي ضريبة الأرباح الرأسمالية.. وده هيخلّيها أكتر جاذبية.. خبراء بيقولوا إن السيولة هتزيد في البورصة لو الفايدة نزلت.. عشان الناس اللي كانت مركزة في الشهادات هتبدأ تحول فلوسها للأسهم.. بس لازم تعرف إن البورصة فيها مخاطرة.. يعني لو مش فاهم السوق كويس.. ممكن تخسر.. فالأفضل تستعين بخبير أو تتابع السوق بنفسك.

النصيحة اللي لازم نقولهالك .. ان لو الفايدة نزلت فعلاً.. مش لازم تتسرع وتاخد قرار على طول.. الدهب هيديك أمان على المدى الطويل.. العقارات هتضمنلك مكسب كبير لو صبرت.. والبورصة هتديك فرصة لو بتحب تلعبها صح.. المهم إنك توزّع فلوسك.. متعتمدش على حاجة واحدة بس.. الاقتصاديين بيقولوا إن تنويع الاستثمارات هو الحل الأمثل.. يعني حط جزء في الدهب.. جزء في العقار.. وجزء في البورصة.. ولو لسه عايز دخل ثابت.. جدد الشهادة حتى لو العائد قلّ شوية.. لأنها لسه هتبقى مرضية لناس كتير.. الدنيا بتتحرك بسرعة.. والتضخم لسه موجود حتى لو قل.. فاختار اللي يناسبك.