مدينة صناعية ضخمة في المنيا باستثمارات غير مسبوقة.. إيه الحكاية وإزاي المشروع الجديد هيغير شكل الحياة في صعيد مصر كله.

كل يوم بيعدي مصر بتتقدم أكتر في كل المجالات وخاصة في المجال الاقتصادي ودا بعد إعادة بناء الدولة من جديد من حيث البنية الاساسية وعمليات التطوير والتعمير والتنمية اللي طالت كل جوانب الحياة في مصر مع تولي الرئيس السيسي للحكم.. 
مصر على مدار السنين اللي فاتت قدرت تبني أرضية صلبة لجذب أي استثمارات خارجية وقدرت تحتل الصدارة في اصطياد الاستثمارات العربية والاجنبية بفضل سنين من التعب والجهد وسباق الزمن.. والقطاع الصناعي كان ليه نصيب كبير في مجمل الاستثمارات سواء محليا أو خارجيا وفيه نهضة صناعية حقيقية بتم دلوقتي في مصر في كل الاتجاهات.

الجديد في ملف الاستثمارات الصناعية كان اللي كشف عنه رئيس المجلس التصديري للملابس الجاهزة في مصر وعضو لجنة تنمية الصادرات التابعة لمجلس الوزراء فاضل مرزوق وقال إنه قدم من ساعات مقترح لمجلس الوزراء لإنشاء مدينة صناعية متخصصة للملابس الجاهزة والمنسوجات على مساحة 5.5 مليون متر مربع في صعيد مصر.

مرزوق كشف كمان إن وزارة الصناعة اقترحت تنفيذ المدينة في محافظة المنيا خاصة مع توفر المساحة المطلوبة بجوار إحدى المناطق الصناعية في المحافظة وإن الموضوع دخل في الجد بعد توجيهات فورية من الدكتور مصطفي مدبولي رئيس الوزراء بالإسراع في توصيل المرافق لقطعة الأرض المقترحة للمدينة وسرعة  البدء في تجهيز وترفيق أرض المدينة الصناعية الجديدة فوراً.

حسب رئيس المجلس التصديري الاستثمارات اللي هتستوعبها المدينة الصناعية الجديدة هتوصل ل2 مليار دولار خلال اول سنة  من تنفيذ المدينة الصناعية الجديدة خاصة مع توفر طلبات استثمارية ورغبات عديدة من شركات كبرى محلية وأجنبية للتوسع في قطاع الغزل والنسيج والملابس الجاهزة في مصر.

المشروع بسرعة بقي حديث الأوساط الاقتصادية لدرجة إن فيه 10 شركات صينية وتركية أبدت الرغبة في الاستثمار بقطاعي الملابس الجاهزة والمنسوجات خلال العام الحالي.. وبالارقام المدينة الصناعية الجديدة في المنيا هتوفر 800 ألف فرصة عمل جديدة لأبناء الصعيد بجانب رفع صادرات الملابس الجاهزة والمنسوجات إلى مستويات قياسية خاصة إن فيه خطة خطة طموحة لزيادة صادرات الملابس الجاهزة لمصرية إلى 12 مليار دولار خلال 6 سنين.

مفيش شك إن مشروع المنطقة الصناعية المقترح هيحقق نقلة نوعية في محافظة المنيا حال تنفيذه وهيساهم في توفير الألاف من فرص العمل لأبناء المحافظة والمحافظات المجاورة وهيرفع مستوى المعيشة وهيغير التركيبة الاقتصادية في المنيا والصعيد كله.

كمان مشورع المدينة الصناعية الجديدة هتساهم في جذب استثمارات صناعية تانية في قطاعات الملابس الجاهزة والمنسوجات يعني بنتكلم في محلة جديد للغزل والنسيج بس المرة دي في الصعيد.