هي إيه قصة المشروعات اللي حصلت على الرخصة الذهبية من الحكومة الفترة اللي فاتت، وإيه هي المشروعات المخطط حصولها عليها في الفترة الجاية، وايه مميزات الرخصة دي، وهل ممكن تكون سبب في زيادة الاستثمارات جوه مصر؟

في الحقيقة، وحدة الرخصة الذهبية في الهيئة العامة للاستثمار والمناطق الحرة، أعلنت عن نتائج مبشرة في الفترة الأخيرة، واللي هي وصول إجمالي المشروعات الحاصلة على الرخصة الذهبية في سنة 2025 ل 4 شركات بتكلفة استثمارية نحو 16.4 مليار جنيه.

والشركات دي كلها في تخصص القطاع الصناعي، وشغالة ما بين الصناعات الغذائية، المعدنية، الأثاث، التعبئة والتغليف، وهي تحديدا: مشروع شركة «لوسافر مصر لصناعة الخمائر»، وهو عبارة عن إقامة وتشغيل مصنع لتصنيع وتعبئة وتغليف الخمائر بكافة أشكالها وأنواعها، بتكلفة استثمارية 120 مليون يورو، وبتقدر توفر فرص عمل لحوالي 130 عامل .

كمان، من بين المشاريع دي، هو مشروع شركة «يادا إيجيبت YADA EGYPT» لصناعة الأثاث، واللي بتوصل تكلفته الاستثمارية ل 70 مليون يورو، وكمان من بين المشروعات اللي حصلت على الرخصة الذهبية، مشروع شركة «شين شينغ لصناعة أنابيب حديد الدكتايل» لتصنيع مسبوكات حديد الزهر، بتكلفة استثمارية 145 مليون دولار أمريكي، وبتقدر توفر فرص عمل لحوالي 700 عامل.

برضو عندك، مشروع شركة «هوتاماكى إيجيبت»، لإقامة وتشغيل مصنع لتصنيع وإنتاج وتوزيع وبيع عبوات مصبوبة الألياف بتكلفة استثمارية 1.5 مليار جنيه، وبتوفر هي كمان فرص عمل لنحو 61 عامل.

ولأن الرخصة الذهبية هي فاتح شهية للمستثمرين، ففي بعض النواب اتقدموا بطلب حاطة للتوسع في منح الرخصة الذهبية وإتاحتها لجميع المشروعات بدل ما هي مقتصرة على مشروعات معينة.

وده مهم جدا لأن في شركات في قطاعات كثيرة، بتاخد وقت ممكن يوصل ل 8 شهور للحصول على التراخيص الصناعية، في الوقت اللي فيه اقتصادنا محتاج لجذب الكثير من الاستثمارات في القطاعات الإنتاجية، فده بيتطلب تسريع الإجراءات لتوطين المنتجات المستوردة لرفع الضغط على الدولار.

كمان، مطلوب تحسين الصورة الذهنية لبيئة الاستثمار في مصر لجذب أكبر حصيلة دولارية، وده لأن الرخصة الذهبية بتمنح فى جميع الدولة العربية، ومنحها لجميع المشروعات بقى ضرورة ملحة للوصول للخطط المستهدفة في التنمية وتوسيع الاستثمارات. 

والرخصة دي بتساعد المستثمر فى تسريع وتيرة إجراءات الحصول على التراخيص للمشروعات الصناعية والبنية التحتية الجديدة بدءا من تخصيص الأراضى واستخراج تراخيص البناء لحد تشغيل المشروع وإدارته، عشان كده مطلوب التوسع في منحها خلال الفترة الجاية عشان نعظم من الاستثمارات اللى داخله البلد.