عمرك سألت نفسك ليه سعر الدهب في مصر بيطلع كل شوية؟ ليه كل ما تفكر تشتري حاجة دهب تلاقي السعر زاد؟ طيب هل ده الوقت المناسب تشتري ولا تبيع؟ تعالوا نحكي الحكاية من أولها.
إيه اللي بيحصل في سوق الدهب في مصر؟
بص يا سيدي، الدهب ده زي الميزان، بيتأثر بحاجات كتير. أول حاجة، الأسعار العالمية للدهب. لما سعر الدهب يعلى بره، طبيعي يعلى عندنا. وده اللي حصل الفترة اللي فاتت، الأسعار العالمية وصلت لمستويات قياسية.
الحاجة اللى لازم نفهمها ان الدهب مش مجرد حاجة بنشتريها عشان نفرح العروسة في الفرح، لأ، الدهب ده بيطلع لسانه لكل حاجة بتحصل في الدنيا! يعني لو الدولار نط في السوق السوداء الدهب يقولك 'أنا معاك' ويركب الصاروخ هو كمان.
بس فيه عوامل محلية بتأثر فى سعر الدهب زي مثلاً سعر الدولار مقابل الجنيه.. لما الدولار يعلى تكلفة استيراد الدهب بتزيد وده بيأثر على سعره في السوق المصري.
ليه الأسعار بترتفع كل شوية؟
فيه كذا سبب.. منها التوترات العالمية.. لما يكون فيه مشاكل اقتصادية أو سياسية في العالم.. الناس بتلجأ للدهب كملاذ آمن، فبيزيد الطلب عليه وسعره يعلى.. فيه كمان التضخم .. لما الأسعار بشكل عام بتزيد، قيمة العملة بتقل، والناس بتستثمر في الدهب للحفاظ على قيمة فلوسها.. ده بالاضافة للعرض والطلب.. لو الطلب على الدهب زاد والمعروض منه قليل السعر طبيعي يعلى.
طب ايه توقعات أسعار الدهب في الفترة الجاية؟
الخبراء شايفين إن سعر الدهب ممكن يفضل متذبذب الفترة اللي جاية.. فيه توقعات بوصول سعر الجرام عيار 21 لمستويات أعلى من 4100 جنيه، وده بيعتمد على تطورات السوق العالمية والمحلية.
ايوة يعني أشتري دلوقتي ولا أبيع؟
لو إنت مستثمر وعايز تحافظ على قيمة فلوسك على المدى الطويل الدهب دايمًا كان استثمار آمن. لكن لو ناوي تشتري وتبيع في المدى القصير لازم تتابع السوق كويس وتشوف التوقعات. وفي النهاية، القرار بيرجع ليك وعلى حسب احتياجاتك وظروفك.
0 تعليق