عمرك سألت نفسك ليه كل ما تحوش شوية فلوس تحس إن قيمتهم بتقل؟ ليه الأسعار كل يوم في حال؟ وإزاي الحكومة بتشتغل ليل نهار على مشاريع وبرامج إصلاح اقتصادي ورغم كده الأسعار بتفضل طالعة؟ هل التضخم ده غول فعلاً بياكل أي جهود اقتصادية؟ والأهم هل الحكومة تقدر تسيطر عليه؟
فى البداية كده وقبل اي حاجة هو يعنى ايه تضخم وتأثيره ايه على الاقتصاد؟
بص يا سيدي.. التضخم ببساطة هو الزيادة المستمرة في أسعار السلع والخدمات يعني نفس الـ100 جنيه اللي كنت بتجيب بيها حاجات كتير من 3 سنين.. دلوقتي ممكن متكفيش غير حاجتين تلاتة بالعافية.. وده بيأثر على كل الناس سواء مواطنين او مستثمرين أو حتى الحكومة نفسها.
ومصر مش لوحدها في المشكلة دي.. التضخم بقى أزمة عالمية بسبب الحرب الروسية الأوكرانية.. وسلاسل الإمداد اللي اتقطعت.. وكمان بعد أزمة كورونا اللي هزت الاقتصاد العالمي.. لكن مصر عندها وضع خاص لأننا دولة معتمدة على الاستيراد.. ومع أي هزة في سعر الصرف.. الأسعار بتولع أكتر.
ليه التضخم غول بياكل أي مجهود اقتصادي؟
الحكومة بتحاول تحارب التضخم بكل الطرق.. بتفتح مشروعات جديدة.. بتدعم الصناعات.. بتحاول تسيطر على الأسواق.. لكن التضخم عامل زي الموجة العالية.. كل ما تيجي توقفها.. بتلاقيها بتيجي عليك أقوى.. لأن التضخم بيأكل أي زيادة في المرتبات.. يعني الحكومة ممكن تزود المرتبات والمعاشات.. لكن لما الأسعار تزيد أسرع من الزيادات دي.. المواطن مش بيحس بأي تحسن.. وده اللي حصل في آخر كام سنة.
مثلاً في 2024.. الحكومة أعلنت عن زيادة جديدة في الأجور والمعاشات.. لكن التضخم اللي وصل لـ35% خلال السنة اللي فاتت.. خلى الزيادة دي متحسش بيها الناس بالشكل الكافي.
السؤال المهم هنا.. هل الحكومة عندها أدوات تخلي التضخم تحت السيطرة؟
الحقيقة فيه طرق كتير.. لكن تطبيقها مش سهل.. الحكومة بتحاول تقلل الاستيراد وتشجع الإنتاج المحلي.. لكن ده بياخد وقت.. كمان بتحاول تسيطر على الأسواق.. وبتعمل مبادرات زي "كتف في كتف" و"كلنا واحد" عشان توفر سلع بأسعار مخفضة
بس المشكلة إن الحاجات دي حلول مؤقتة.. وعلشان نحل المشكلة بشكل جذري.. لازم يبقى عندنا إنتاج محلي قوي يغطي الطلب وما نعتمدش على الاستيراد بالعملة الصعبة.
هنا بييجي دور البنك المركزي.. اللي بيحاول يتحكم في التضخم بأسلحته الخاصة.. وأهمها سعر الفايدة.. لما التضخم بيعلى.. البنك المركزي بيرفع سعر الفائدة عشان يقلل السيولة في السوق.. يعني الناس تبطل تقترض وتستهلك كتير.. فبالتالي الطلب يقل والأسعار تهدى.
وده اللي حصل في مارس 2024 لما البنك المركزي رفع الفايدة بنسبة 6% دفعة واحدة.. وده كان أكبر رفع في تاريخ مصر.. القرار ده كان ضروري عشان يحد من التضخم.. لكنه بيجي مع آثار جانبية.. زي إن القروض بتبقى أغلى.. والاستثمار بيقل.. وده بيأثر على النمو الاقتصادي.
طب هل التضخم هيفضل غول؟
الموضوع معقد.. ومفيش حل سحري يقدر ينهي التضخم في يوم وليلة.. الحل الحقيقي هو زيادة الإنتاج.. تقليل الاستيراد.. وتشجيع الاستثمار الحقيقي اللي يخلق فرص عمل ويزود المعروض من السلع.. البنك المركزي بيعمل اللي يقدر عليه.. والحكومة بتحاول.. لكن المواطن هو كمان لازم يبقى واعي بإزاي يتعامل مع التضخم.. يحوش بشكل ذكي.. ويعرف إزاي يدير فلوسه في أوقات الأزمات.
التضخم ممكن يكون غول.. لكن لو عرفنا نلعبها صح.. ممكن نحوله من وحش بياكل مجهودنا.. لحافز يدفعنا نشتغل أكتر ونفكر في حلول جديدة.
0 تعليق