خلاص وزارة الإسكان اعلنت عن نتيجة سكن لكل المصريين 5، ولكن لاول مرة تظهر علامات كتيرة للرفض لاسباب أول مرة تحصل في تاريخ الإسكان الإجتماعي.. يا ترى اية هيا ابرز الاسباب وازي الناس تقدر تتظلم عليها.

سكن لكل المصريين 5 واحدة من اهم وأكبر مشروعات الإسكان اللي شهدت إقبال كبيرة من المصريين ووصل عدد المواطنين اللي اشتروا كراسات الشروط لـ 762 ألف مواطن سدد منهم 589 ألف مواطن مقدمات جدية الحجز واللي وصلت لـ20 الف جنية للشقق السكنية الموجودة في المحافظات و 30 الف جنية للشقق السكنية الموجودة في المدن الجديدة، وسجل منهم علي الموقع الإلكتروني للصندوق 571 ألف مواطن.

طيب اية حكاية المعايير الجديدة اللي علي اساسها صندوق الإسكان الاجتماعي ودعم التطوير العقاري استبعد عدد كبير من المواطنين؟.

صندوق الإسكان الإجتماعي اعلن وبشكل رسمي نتيجة سكن كل المصريين 5، والصندوق بعت رسائل لكل الناس سواء كانوا فائزين أو غير فائزين بالقرعة، لكن المرة دي حصلت حاجة مختلفة لأول مرة في تاريخ الإسكان وهيا الاستبعاد بسبب وجود عدادات سواء كان عداد كهرباء أو عداد مياة أو عداد غاز طبيعي أو امتلاك وحدة سكنية، وده عكس اللي كان بيحصل قبل كده، خصوصا أن الاستبعاد في السنين اللي فاتت كان علي اساس الاستفادة من مشاريع الإسكان المختلفة.

صندوق الإسكان الأجتماعي اتاح للمواطنين التظلم علي النتيجة خلال الفترة من 23 مارس ولحد 24 أبريل، ودي للناس اللي وصلت لهم رسائل بالرفض، وطالب المواطنين اللي وصلت لهم رسائل بامتلاك عداد كهرباء أو مياة أو غاز طبيعي بتقديم مستندات من جهات حكومية بعدم امتلاك وحدات أو شقق سكنية، خصوصا أن الشقق المطروحة للإسكان الإجتماعي الهدف منها هو دعم الفئات محدودة الدخل والفئات الاولي بالرعاية، ده غير كمان أن في بعض الناس وصلت لهم رسائل بالرفض بسبب نقص في المستندات المطلوبة للتقديم، وده هيكونوا مطالبين بارفاق المستندات المطلوبة في ملف التقديم، والصندوق هيبدأ يعيد النظر في التظلمات اللي وصلت له، وهيفرزها وهيعلن بعدها عن النتيجة النهائية لسكن كل المصريين 5 وهيتم توزيع الشقق بناء علي الأولوية.