ايه رأيك لو قولتلك إن قرار واحد ممكن يقلب الدنيا رأس على عقب؟ .. تخيل معايا .. السلع اللي بتشتريها كل يوم زي العربيات والموبايلات والأدوية ترتفع أسعارها فجأة .. ليه؟ .. عشان فيه رئيس قرر يحط رسوم جديدة على كل حاجة بتدخل بلده .. طب السؤال الأهم .. مين اللي هيدفع تمن القرار ده؟ .. إحنا كمستهلكين ولا التجار ولا الدول نفسها؟ .. فس الفيديو ده هنتكلم عن حكاية رسوم يوم التحرير اللي ترامب ناوي يفرضها .. وإزاي هتأثر على حركة التجارة العالمية .. وايه موقف أوروبا والصين منها .. جهزوا نفسكم عشان الموضوع كبير ومليان مفاجآت.

أول حاجة لازم نفهمها .. ايه هي رسوم يوم التحرير دي؟

ببساطة هي خطة ترامب الجديدة اللي أعلن عنها مؤخرا.. الراجل قال إنه هيفرض رسوم جمركية على كل الواردات اللي بتدخل أمريكا .. ومش أي رسوم .. دي بتوصل لحد 25% على حاجات زي العربيات والصلب والألمنيوم .. وحتى 20% على كل اللي بيجي من الصين

طب ليه بيعمل كده؟

ترامب شايف إن أمريكا بتتظلم في التجارة .. بيقول إن الدول التانية بتستغلها من سنين .. وبوست بتاعه على تروث سوشيال قال فيه: 'حان الوقت نرجع فلوسنا واحترامنا' .. فكرة يوم التحرير دي باختصار إنه عايز يخلي أمريكا تعتمد على نفسها أكتر وتقلل الواردات من برا.

طب القرار ده هيعمل ايه في التجارة العالمية؟

بص يا سيدي .. لو الرسوم دي اتطبقت فعلاً .. هنشوف موجة جديدة من الحروب التجارية .. يعني الدول مش هتسكت .. هترد بنفس الطريقة .. تخيل لو كل دولة حطت رسوم على البضاعة الأمريكية .. السوق العالمي هيتحول لماتش مصارعة .. الكل بيضرب الكل .. وفي الآخر مين اللي هيخسر؟ .. المستهلك زيك وزيي .. لأن أسعار كل حاجة هتزيد .. من العربية اللي ناوي تشتريها للدوا اللي بتاخده كل يوم .. ومش بس كده .. سلاسل التوريد اللي بنعتمد عليها عالمياً هتتربك .. يعني مصنع في الصين بيبعت قطع لأمريكا .. ومصنع في أمريكا بيبعت منتجات لأوروبا .. كل ده هيتأخر وهيتكلف أكتر.

ولو جينا نتكلم عن التفاصيل .. ترامب بدأ فعلاً يحط رسوم على العربيات بنسبة 25% من يوم 26 مارس اللي فات .. وكمان بيفكر يزود رسوم على الرقائق الإلكترونية والأدوية .. ومش بس كده .. كندا والمكسيك كمان هياخدوا نصيبهم من الرسوم دي بنسبة 25% .. مع إنه كان فيه اتفاقية تجارة حرة بينهم من 2020 .. لكن ترامب شايف إن الاتفاقية دي مش عادلة .. وكمان حط رسوم ثانوية على أي دولة بتشتري نفط من فنزويلا .. يعني بيضرب في كل حتة .. واللي بيساعده في ده قوانين طوارئ زي قانون الصلاحيات الاقتصادية الدولية .. اللي بتديله الحق يحط رسوم تصل لـ50% لو عايز

طب إزاي أوروبا هتتعامل مع الموضوع ده؟ أوروبا مش ساكتة خالص .. الاتحاد الأوروبي خايف إنه يكون الهدف الجاي بعد الصين وكندا والمكسيك .. رئيسة المفوضية الأوروبية أورسولا فون دير لاين قالت إنهم مستعدين لمفاوضات صعبة .. لكنها شددت إن القرارات لازم تكون عقلانية .. مش انفعالية .. وفعلاً أوروبا بتحضر ردها .. فيه كلام إنهم ممكن يفرضوا رسوم على منتجات أمريكية بقيمة 28 مليار دولار .. يعني لو ترامب ضرب .. أوروبا هتضرب بالمثل .. وده معناه إن التوتر التجاري بين أمريكا وأوروبا هيزيد .. وممكن يأثر على حاجات زي تصدير العربيات الألمانية أو النبيت الفرنسي لأمريكا."

طب والصين؟

الصين دي اللي هتاخد الصفعة الأكبر .. ترامب حاطط رسوم 20% على كل حاجة بتيجي منها .. ومش أول مرة .. في ولايته الأولى سنة 2018 بدأ حرب تجارية معاهم استمرت سنتين .. والنهاردة الصين مستعدة

ترد .. بكين أعلنت إنها هتفرض رسوم على منتجات أمريكية زي فول الصويا والذرة بقيمة 22 مليار دولار .. وكمان بتحاول تبص لأسواق تانية تصدر لها بضاعتها .. زي آسيا والدول الناشئة .. بلاش كده .. الصين رفعت شكوى لمنظمة التجارة العالمية ضد أمريكا .. لكن الخبراء شايفين إن الشكوى دي مش هتنجح .. لأن اللجنة اللي بتحكم في النزاعات مش شغّالة دلوقتي

في الآخر .. السؤال اللي لازم نسأله .. هيستفيد مين من الكلام ده؟ .. ترامب بيقول إنه عايز يحمي الصناعة الأمريكية ويخلّي الشركات ترجع تنتج جوا أمريكا .. لكن الدراسات بتقول إن الرسوم دي ممكن تكلف أمريكا نفسها خساير كبيرة .. زي 245 ألف وظيفة اتخسروا في ولايته الأولى .. وكمان التضخم هيزيد .. يعني المستهلك الأمريكي هو اللي هيدفع التمن في النهاية .. ولو الدول ردت بنفس الطريقة .. التجارة العالمية هتبقى في خطر حقيقي .. سلاسل التوريد هتتعطل .. والنمو الاقتصادي هيبطئ .. والدول الناشئة زينا هتتأثر لأن الاستثمارات هتقل.