يا ترى إيه اللي بيحصل في العالم دلوقتي؟ .. تخيّل إنك بتصحى الصبح تلاقي الدنيا كلها بتهتز من قرار واحد .. قرار أمريكي جديد بيضرب الاقتصاد العالمي في مقتل .. رسوم جمركية جديدة من ترامب .. طب إيه حكايتها؟ .. وليه العالم كله متوتر منها؟ .. وأهم سؤال: إحنا في مصر هنتأثر بيها ولا لأ؟ .. ولو هنتأثر .. ياترى هتبقى الضربة قد إيه؟ 

"أول حاجة محتاجين نعرفها.. هي إيه  الرسوم الجمركية دي أصلاً؟ .. ببساطة هي ضريبة بتتفرض على البضايع اللي بتدخل أي بلد من برا .. يعني لو مصر بتصدر منسوجات لأمريكا مثلاً .. أمريكا بتقول دلوقتي: أي حاجة تدخل عندي هتدفعلي رسوم زيادة .. وترامب مش بيلعب .. أعلن يوم 2 أبريل 2025 في مؤتمر صحفي في البيت الأبيض عن حزمة رسوم جديدة تحت شعار استعادة ثراء أمريكا .. الراجل قال إنه هيفرض رسوم على 184 دولة وجزيرة حول العالم .. ومش أي رسوم .. تبدأ من 10% وتصل لـ49% على دول زي كولومبيا .. وفيتنام 46% .. وحتى الصين 34% .. وده غير رسوم 25% على العربيات المستوردة اللي بدأت فعلاً من منتصف ليل 2 أبريل.

طب ليه ترامب بيعمل كده؟ 
الفكرة إنه عايز يرجّع الصناعة لأمريكا .. يعني بدل ما الشركات تشتري بضايع رخيصة من برا .. يخلّيها تصنّع جوا أمريكا .. وكمان عايز يقلل العجز التجاري اللي بيعاني منه مع دول كتير.

بس السؤال المهم هي دي خطة هتنجح ولا هتولّع الدنيا؟ 
خبراء الاقتصاد بيقولوا إن الاحتمالات إن أمريكا نفسها تدخل في ركود اقتصادي زادت لـ50% بسبب القرار ده .. يعني ممكن ترامب يكون بيضرب نفسه بنفسه.

وخلينا نشوف تأثيرها على الاقتصاد العالمي بقى .. الرسوم دي زي قنبلة موقوتة .. هترفع تكلفة البضايع في كل حتة .. يعني السيارات .. الألمنيوم .. البترول .. الزراعة .. حتى النبيذ هيتأثر .. الدول اللي بتصدّر لأمريكا هتخسر ملايين .. ولو الدول دي ردت بفرض رسوم على البضايع الأمريكية .. هتبقى حرب تجارية عالمية شاملة .. الصين مثلاً بتفكر ترفع دعوى في منظمة التجارة العالمية .. وكندا والمكسيك بيجهزوا رسوم انتقامية .. حتى الاتحاد الأوروبي بيناقش إزاي يرد على الضربة دي.

طب مين أكتر دول هتتأثر؟ 
لو بصينا على القايمة اللي نشرها البيت الأبيض يوم 2 أبريل 2025 .. هتلاقي دول زي كولومبيا وفيتنام في المقدمة بسبب الرسوم العالية اللي وصلت 49% و46% .. الصين كمان هتاخد ضربة قوية برغم إن الرسوم عليها 34% .. لأنها بتصدر بضايع بمليارات لأمريكا .. كندا والمكسيك كمان في المركز الأول بسبب رسوم 25% على كل حاجة بيصدروها .. والدول العربية مش بعيد عن الصورة .. سوريا مثلاً هتدفع 41% .. العراق 39% .. الأردن 20% .. ومصر والسعودية والإمارات والمغرب كلهم 10%".

طيب إحنا في مصر هنتأثر إزاي؟ 
بص يا سيدي .. مصر بتصدر لأمريكا حاجات زي المنسوجات والمنتجات الزراعية بقيمة حوالي 1.1 مليار دولار سنوياً .. الرسوم الجديدة اللي 10% دي ممكن تكلفنا زيادة 273 مليون دولار في تكاليف التصدير .. يعني المنسوجات المصرية هتبقى أغلى في السوق الأمريكي .. وده هيقلل تنافسيتها .. وبالتالي ممكن يأثر على الوظايف في القطاع ده .. من ناحية تانية .. لو بصينا على الواردات من أمريكا زي القمح مثلاً .. اللي بنستورده بكميات كبيرة .. لو مصر ردت بفرض رسوم على أمريكا .. تكلفة الواردات ممكن تزيد بـ495 مليون دولار .. وده يعني أسعار أعلى للمستهلك المصري .. يعني الخبز والسلع الأساسية ممكن ترتفع.

بس مش كل حاجة سودا .. فيه خبراء بيقولوا إن تأثير الرسوم دي على مصر ممكن يكون محدود نسبياً .. ليه؟  لأن صادراتنا لأمريكا مش كبيرة أوي قصاد دول زي الصين أو الهند .. وكمان مصر ممكن تستغل الفرصة دي وتبص على شركاء تجاريين جدد زي أوروبا أو آسيا .. يعني لو لعبنا صح .. ممكن نطلع من الأزمة دي بمكاسب بدل الخساير.

المشكلة الكبيرة إن الاقتصاد المصري أصلاً بيعاني .. القطاع الخاص غير النفطي بينكمش .. والدولار بيضغط على الجنيه .. فلو الرسوم دي زادت الضغط .. ممكن نشوف تضخم أكبر وأسعار أعلى .. بس في نفس الوقت .. لو الحكومة فكرت في خطة ذكية للتصدير وتنويع الشركاء .. ممكن نعدي الموجة دي بأقل خساير.