يا ترى هي المنتجات الغذائية المصرية هتعرف تخش السوق الأمريكي تاني بدون جمارك بعد قرارات الرئيس ترامب بفرض رسوم 10%، ولا ممكن يحصل إجراء جديد يسهل عليها التوغل داخل أسواق الولايات المتحدة، طب هل ممكن احنا نحول الرسوم الجمركية دي من نقمة لنعمة ونقدر نحقق أكبر استفادة منها.

طبعا كلنا اتفاجئنا في الأيام الأخيرة، بقرار الرئيس الأمريكي دونالد ترامب بفرض رسوم جمركية على أي بضايع تخش السوق الأمريكي، وتحديدا بضائع أكتر من 60 دولة، وكان النصيب الأكبر لمنتجات الصين، عشان تعلن أمريكا عن حرب تجارية عالمية هزت الأسواق واقتصادات العالم.

ومن ناحية مصر، فأمريكا فرضت رسوم 10% على أي بضايع مصرية تخش أسواقها، لكن احنا ممكن تحول الأزمة دي لمنحة كبيرة ونفدر كمان نستفيد منها، وده من خلال اننا نعتبرها فرص استراتيجية غير مسبوقة قدام الصادرات المصرية لدخول السوق الأمريكي.

يعني مثلا، مصر بتحتفظ بميزة تنافسية قوية بفضل انخفاض الرسوم الجمركية المفروضة على صادراتها الغذائية للولايات المتحدة، اللي لا تتجاوز في المتوسط 10%، وده بيمثل فرصة ذهبية لتوسيع الحصة السوقية للمنتجات المصرية، خاصة المنتجات اللي بتتمتع بجودة عالية وقبول واسع لدى المستهلك الأمريكي.

كمان، ممكن نستفيد من التحولات دي بشكل سريع، ونركز على المنتجات اللي بتشهد طلب مرتفع في السوق الأمريكي، بجانب تطوير سلاسل الإمداد وتعزيز الالتزام بالمعايير الدولية.

برضو، الفرصة قدامنا كبيرة عشان منتجاتنا تتوغل اكتر في السوق الأمريكي بدلا من المنتجات الصينية والآسيوية، خاصة وإن دول الصين، فيتنام، البرازيل، تايلاند، إندونيسيا، ودول الاتحاد الأوروبي، واللي بتمثل  27٪ من إجمالي واردات الغذاء الأمريكية بقيمة بتتجاوز 58 مليار دولار، بقت بتواجه رسوم جمركية إضافية تتراوح بين 20% و145%، فده بيؤثر بشكل مباشر على تنافسية منتجاتها في السوق الأمريكي، فممكن احنا نتوغل اكتر وندفع بصادرات اكتر لأمريكا.

والكلام ده معناه إن في فرص جديدة في السوق الأمريكي، واننا لازم نستفيد من التغيرات الجمركية الأخيرة، عشان نتوسع أكتر، ونحقق أكبر نفاذ للأسواق الخارجية.

ونقدر نقول إن مصر ممكن تستفيد برضو من الوضع ده، في حالة التركيز على إعادة تصدير المنتجات والسلع للسوق الأمريكية، والاستفادة من زيادة صادراتنا للولايات المتحدة، وده هينعكس على نمو عوائدنا الدولارية.

ولغة الأرقام بتقول، إن صادرات مصر للولايات المتحدة بلغت 2.2 مليار دولار خلال سنة 2024 بنسبة نمو سنوي 12.3%، وأبرز المنتجات المصدرة هي: الملابس بقيمة 739.9 مليون دولار، والخضر والفواكه بقيمة 113.8 مليون دولار، والسجاد وأغطية أرضيات بقيمة 123.3 مليون دولار، والحديد والصلب بقيمة 227.7 مليون دولار.

كمان، الملابس المصرية المُصدرة للولايات المتحدة بتقدر تنافس الواردة من دول الصين وفيتنام وبنغلاديش، عشان كده لازم نستفيد كويس من ملف الرسوم الجمركية ونتوغل اكتر في السوق الأمريكية.