يا ترى لما ابنك بيمسك الموبايل أو التابلت بتطمن عليه ولا بتسيبوا يكتشف العالم ده لوحده ؟ هل فكرت إن العالم الرقمي ده ممكن يكون فيه مخاطر كتير على أولادنا؟ وإزاي ممكن نعلمهم أساسيات الأمان وهم لسه صغيرين؟ والأهم إزاي نبني عندهم وعي مالي سليم من بدري عشان يحموا فلوسهم في المستقبل؟ تعالوا نعرف سوا إزاي نقدر نحمي ولادنا ونحصنهم ضد أي محاولات احتيال سواء في عالم الأونلاين أو في تعاملاتهم المالية.

بص يا سيدي.. ولادنا دلوقتي بيتولدوا وعينهم على الشاشات.. الإنترنت بقى جزء لا يتجزأ من حياتهم. عشان كده، تعليمهم أساسيات الأمان الرقمي مش رفاهية، ده ضرورة ملحة.

طب  إزاي نعمل كده؟

لازم ترفع شعار "الغريب أونلاين زي الغريب في الشارع".. علم ابنك إن أي حد يكلمه أونلاين ومش عارفه، ده زي الغريب في الشارع بالظبط. مايتكلمش معاه، مايردش عليه، ومايديش أي معلومات شخصية زي اسمه الكامل، عنوانه، رقم تليفونه، أو اسم مدرسته.

و فهمه إن أي لينك يجيله من مصدر مش معروف أو شكله غريب، مايدوسش عليه. ممكن يكون ده فخ عشان ينزل برنامج خبيث على الجهاز، أو يسرق معلوماته.

وعلمه ولادك إن الباسوردات بتاعتهم، سواء للعبة أو لأي تطبيق، سرية جداً وماينفعش يدوها لأي حد، حتى لأصحابه المقربين. وشجعهم يستخدموا باسوردات قوية وصعبة التخمين.

و علمهم كمان إنهم مايشاركنش صور أو فيديوهات شخصية لأي حد أونلاين، خصوصاً لو صور خاصة بيهم أو بأسرهم. وإن أي حاجة بتتنشر على الإنترنت، بتفضل موجودة.

وأهم حاجة.. ابنك أو بنتك يعرفوا إنك ملاذهم الأول لو حصل أي حاجة أونلاين قلقاهم، أو حد ضايقهم، أو طلب منهم حاجة غريبة، لازم يجوا يحكولك فوراً ومن غير خوف.

مش بس الأمان الرقمي لازم نربي في أولادنا كمان وعي مالي سليم عشان يعرفوا قيمة الفلوس وإزاي يحافظوا عليها.

علمهم إن الفلوس دي بتيجي من مجهود وشغل. ممكن تديهم مهام بسيطة في البيت ومقابلها تديهم مبلغ صغير، عشان يحسوا بقيمة المجهود اللي بيتعمل عشان الفلوس دي تيجي.

علمهم يقسموا مصروفهم.. جزء للمصاريف اليومية، جزء للادخار (عشان يشتروا حاجة نفسهم فيها)، وجزء بسيط ممكن يكون للتبرع أو مساعدة حد.. ده بيعلمهم التخطيط وإدارة الفلوس.

شجعهم يحطوا أهداف للادخار. مثلاً عايز يشتري لعبة غالية، شجعه يحوش لها. ده بيعلمهم الصبر وتحمل المسؤولية عشان يوصلوا لهدفهم.

علمهم يفرقوا بين "الحاجة" (زي الأكل والشرب واللبس) و"الرغبة" (زي لعبة جديدة أو شوكولاتة زيادة). ده بيخليهم يفكروا قبل ما يصرفوا فلوسهم.

و لما يكبروا شوية، فهمهم إن مفيش حاجة اسمها "فلوس بتيجي من السما". أي حد يوعدهم بمكسب سهل وسريع أو مبلغ كبير بدون مجهود، ده بيكون نصاب.

وخلى بالك.. تربية ولادنا في العصر ده محتاجة مجهود إضافي. الأمان الرقمي والتثقيف المالي لازم يكونوا جزء أساسي من تربيتنا ليهم. لما نعلمهم بدري، بنحميهم من مخاطر كتير في المستقبل، وبنزرع جواهم بذور الاستقلال المالي والوعي. ولادنا أمانة، وحمايتهم واجب علينا كلنا.