مصر عندها مدينة اقتصادية جديدة اسمها مدينة الروبيكي وده مخصصة لصناعات الجلود، والدولة حاليا حطت خطة لاعادة احياء المدينة ولكن بمخططات توسعية كبيرة وتكنولوجيا متطورة.. ياتري اية خطة الحكومة لتطوير مدينة الروبيكي.. واية مستهدفات الحكومة من تطويرها.

مصر في الوقت الحالي بدأت مرحلة جديدة من مراحل أعادة احياء الصناعة المصرية، والحكومة حطت استراتيجية قومية لجذب الاستثمارات ورؤوس الأموال للسوق المصري، والاستراتيجية دي استهدف زيادة الإنتاج المحلي في كل القطاعات، واحدة من القطاعات دي هيا صناعة الجلود واللي الدولة خطت خطة لتطوير مدينة بتعد من اكبر المدن الصناعية في مصر والشرق الأوسط، وهيا مدينة الروبيكى ودي متخصصة في دباغة الجلود.

الرئيس عبدالفتاح السيسي عطي اشارة للحكومة لوضع تخطيط جديد ومتماشي مع الخطط والتطورات التكنولوجية في صناعة مهمة وهيا صناعة الجلود في مدينة الروبيكي، وكمان الحكومة راعت في التخطيط أنها تكون صديقة للبيئة وافتتاحها الرئيس عبد الفتاح السيسي في 2022.

طيب اية اللي بتعمله الحكومة علشان تنشط وتطور صناعة الجلود في مصر؟.
وزارة الصناعة حاليا بتعتزم طرح 36 مصنع بمساحات هتترواح ما بين 1000 و2000 متر مربع ضمن المرحلة الثالثة من مدينة الروبيكي للجلود في شهر يوليو اللي جاي، وحاليا الحكومة بتعمل تقييم لسعر المصانع الجديدة، والتوقعات بتقول أن سعر المتر فيها مش هيتعدي 13 ألف جنيه، والمصانع دي هتكون جاهزة علي تركيب المكن والالآت اللي هتدخل في التشغيل علي طول.

الخطة الحكومية الجديدة لزيادة الاستثمارات في مدينة الروبيكي متوقع أنها تضم 100 مصنع متوسط، و121 مصنع صغير، وفعلا الحكومة نجحت في بيع 48 مصنع في الوقت اللي فات، وكل التوقعات بتقول أن هيكون في اقبال كبير جدا من المسثتمرين بمجرد صدور قرار الحكومة بالطرح الجديد، خصوصا في ظل الحاجة الكبيرة المطلوبة للمنتجات الجلدية سواء في مصر أو في الأسواق الخارجية.

الحكومة اشترطت في الطرح الثالث والجديد لمصانع مدينة الروبيكي أن المستثمرين يبدوا تشغيل المشروع خلال سنة من وقت حصوله على الفرصة الاستثمارية والحكومة شايفة أن دي فرصة كويسة جدا للمسثتمرين لبدء التشغيل والإنتاج.

التوسعات والتطوير الكبير اللي قامت بيه الدولة في مدينة الروبيكي، خلي في طلب من مستثمرين أجانب للدخول لقطاع مهم عندها وهم صناعة ودباغة الجلود، وده اللي حصل وفي شركة تركية متخصصة في صناعة الجلود طلبت من وزارة الصناعة تخصيص 80 ألف متر مربع لإقامة مصنع باستثمارات هتتعدي أكثر من 2 مليار جنيه، ومتوقع أنه يتم توقيع عقود التخصيص في شهر يونيو الجاري، وهيوصل تسعير المتر هناك للشركة التركية لـ 100 دولار للمتر الواحد، والحكومة بتستهدف طرح 60% من أراضي المدينة قدام الشركات المحلية والعالمية لضخ استثمارات جديدة .

مش بس تركيا اللي دخلت علي خط الاستثمار في صناعة ودباغة الجلود، لا ده كمان في شركة ألمانية بتتفاوض مع وزارة الصناعة للحصول على 88 ألف متر مربع بالمدينة لإنشاء مصنع للمنتجات الجلدية، باستثمارات تتراوح بين 13 إلى 15 مليار جنيه، وهيوصل سعر المتر لـ 100 دولار للمتر.