خرج أحمد شامل عزمي، زوج الفنانة أسما شريف منير وتحدث عن زواجه منها مشيرا إلى أنه تشرف من تلك الزيجة ووعد والدها أن يعمل بوصيته ويكون جدير بالثقة الذي أعطاها له شريف منير.

أول تعليق من أحمد شامل زوج أسما شريف منير على زواجه 

ونشر أحمد شامل مجموعة صور جديدة له من عقد قرانه على أسما شريف منير وعلق عليها، قائلا في منشور رصده موقع تحيا مصر : ‎أنا متشرف جداً ان اسما مراتي، وأهلها الطيبين المحترمين، اللي عندهم احساس بالبشر، علموني حاجات كتير. بشكر والد أسما على الثقة اللي ادهلي، وعايز أطمنه إن أسما في عيني، وبوعده إني هبذل أقصى ما عندي عشان أسعدها.

وتابع زوج أسما شريف منير حديثه: ‎رأي الشخصي ان العلاقات دايماً بتحتاج مجهود من الطرفين عشان يحتووا ويقدروا بعض. الرجالة بالذات عليهم دور القوامة و ده في الدين، بس القوامة مش معناها التسلط، زي ما اغلب الرجاله فاهمة! هي رعاية ومسؤولية. الراجل لازم يكون داعم وسند لمراته ويتعامل معاها برحمة واحترام. لما بنشد بعض لطريق ربنا، ونتعامل بنية صادقة، ربنا بيكرمنا وبيعود علينا برزق و حاجة فيها هدوء و امان . عندي رساله بسيطة اوي، دوروا على رضا ربنا و إسعي وتوكل علي ربنا، بالمعاملة الكويسة، الرحمة، وحب الخير مش هتلاقوا غير خير و رزق واسع و اماني بتحقق.

أسما شريف منير تعلن زواجها 

وكانت قد خرجت أسما شريف منير بشكل مفاجئ لتعلن عن زواجها، فقالت: أنا الحمد لله اتجوزت وده قرار جه بعد فترة طويلة من رحلة عشتها مع نفسي من حاجات كتير قوي اتعلمتها تجارب دخلت فيها اختيارات وصلت لها حاجات بقيت بحبها، وحاجات ما بقيتش بحبها. فهمت نفسي أكثر اتعرفت على نفسي أكثر، فهمت أنا محتاجة إيه من الجواز، إيه المهم وإيه اللي مش مهم، إيه اللي محتاج مجهود وإيه اللي مش محتاج مجهود، اتكلمت مع ربنا كتير لحد ما جه وقت صدقت جداً وكان عندي يقين غير عادي إن ربنا هيحقق لي الحاجة دي. لأني كنت عديت بفترة تعب كبيرة قوي نفسي علشان أقدر أتخطى ده. كان بفكرة إنه صحیت نفسي في الشغل وتوكلت على ربنا ومقررة إنه هو هيختار لي الأصلح.

وتابعت أسما شريف منير حديثها: اللي شدني في أحمد إنه قريب من ربنا و بيغيرش الحقايق وعارف مسؤولياته تجاه ربنا وعيلته، وعارف معاملاته تجاه ربنا عاملة إزاي. فلقيت الشخص اللي ممكن يبقى بيعامل الناس وجواه سالك، جواه إيمان ده حد تقدر تثق فيه وتحس إنه تقدر تبني معاه حياة وإنت متطمن. أكيد بنتضايق ونزعل من بعض، احنا الاتنين فينا عيوب وكل حاجة زي كل البشر ، بس فكرة إن الاختيار نفسه ربنا وفقني فيه و سهلها من عنده، يا رب يبقي خير، لحد ما أموت يبقى هو في حياتي.

وصية شريف منير لزوج ابنته

وفي عقد القران، قال شريف منير لزوج ابنته رسالة مؤثرة جاء فيها: أسما تعبت وكافحت ووقفت جنبي كتير، أنا عايز اقولكم أنها تعتبر أم ليا وهي اللي بتوجهني وبتظبطلي حياتي، نفسي جدا أن أحمد ياخد باله منها مش طالب منه أي حاجة غير أنه يبقى حنين عليها ومحتويها لأن أنا في يوم من الأيام ربنا يديكم العمر والصحة أنا همشي عايز أبقى مطمن عليها.