أكتر من 6 مليون مواطن مصري بيستخدموا تطبيق "انستا باي"، المتخصص في تحويل الأموال، واللي سهل على ناس كتير تعاملاتهم المادية، هي تكة واحدة وكله يبقى تمام، وده بدل ما تخبط مشوار لأقرب Atm أو تزور أي فرع بنك... إيه الجديد في تطبيق انستاباي بعد قرار المركزي الأخير.. خليكم معانا للآخر وهتعرفوا التفاصيل

عشان كده، في كتير وخاصة اللي عندهم معاملات تجارية، بيدورا عن حدود السحب من إنستاباي، بعد قرار لجنة السياسة النقدية بالبنك المركزي فى نهاية اجتماعها أمس الخميس 21 نوفمبر، بتثبيت سعرى عائد الإيداع والإقراض لليلة واحدة عند 27.25%، 28.25% على الترتيب.

وكانت لجنة السياسة النقدية فى اجتماعها الاستثنائي يوم 6 مارس الماضي، قررت رفع سعرى عائد الإيداع والإقراض لليلة واحدة وسعر العملية الرئيسية للبنك المركزي بواقع 600 نقطة أساس ليصل إلى 27.25%، 28.25% و27.75%، على الترتيب، كمات تم رفع سعر الائتمان والخصم بواقع 600 نقطة أساس ليصل إلى 27.75%.

ونيجي بقى لحدود السحب نن انستا باي واللي بيشغل بال ناس كتير، خاصة بعد تعديل الحد الأقصى للمعاملات اليومية والشهرية، والحد الأقصى للمعاملة الواحدة على التطبيق الرقمي، وفق القواعد المنظمة لخدمات تطبيق المدفوعات اللحظية، إنستا باي، أو المنظومة الوطنية للمدفوعات اللحظية.

وفي آخر تحديث للبنك المركزي المصري، فبتتفاوت حدود السحب من تطبيق إنستا، فالحد الأقصى للسحب للمعاملة الواحدة، بيوصل ل 70 ألف جنيه، والحد الأقصى للمعاملات في اليوم  120 ألف جنيه، أما على مدار الشهر فلازم السحب مايزيدش عن  400 ألف جنيه.

ونقدر نقول، إن من أهم مميزات تطبيق "انستا باي"، إنه بيتيح لحضرتك الوصول المباشر إلى جميع حساباتك البنكية وتحويل الأموال لحظيًا من خلال الهاتف المحمول، فبتقوم بفتح التطبيق ثم تضغط على إرسال نقود، وبيتم في الخطوة اللي بعد كده الضغط على رقم الهاتف، بعدين علامة حساب بنكي، وبعد كل الخطوات دي بتدخل البيانات المطلوبة، واللي هي رقم الهاتف، المبلغ، بعدين تضغط على التالي، وتراجع بيانات التحويل.

وفي النهاية، بيتم إدخال الرقم السري IPN PIN المكون من 6 أرقام، بعدين تضغط على إدخال، ومن هنا يكون التحويل تم بنجاح.

ولو حضرتك بتستخدم انستا باي على طول، فهنقولك شوية معلومات مهمة، واللي هي لازم تعر المعلومات المهمة عن التطبيق قبل الاشتراك وإجراء المعاملات النقدية، زي إن خدمة سحب الفلوس من البرنامج اللي بتم عن طريق ATM غير متوفرة دلوقتي، والبريد المصري مش مشترك في الخدمة، وكمان غير متاح إضافة فيزا المشتريات على تطبيق إنستا باي.

ضيف على كل ده، إن لا يصلح التحويل من المحفظة للبرنامج لكن يصلح العكس، وبيتيح إنستا باي التحويل إلى محفظة أو حساب بنكي بدون أي رسوم على جميع التحويلات.

ومن أهم مميزات إنستا باي، إنه بيتيح لحضرتك ربط جميع الحسابات المصرفية المختلفة للعملاء في تطبيق واحد للهاتف المحمول، وبيمكنك من التحويل الفوري من حساباتك داخل البنوك المسجلة على الشبكة في مصر، وكمان التحويل الفوري داخل حسابات شبكة بنوك مصر والمحافظ الرقمية وبطاقة ميزة.

ومتاح الاستعلام عن رصيد الحسابات وإصدار كشف حساب مصغر للبنك، بالإضافة لإضافة حسابات بنكية متعددة ضمن شبكة بنوك مصر.

وأخيرا، لو أنت بتستخدم انستا باي، خد بالك كويس أثناء التحويل، عشان لو نفدت عملية تحويل لحد بالغلط ممكن جدا فلوسك تضيع عليك.