واقعة مأساوية شهدتها حضانة شهيرة فى حدائق حلوان بسبب الإهمال، كادت أن تؤدى بحياة طفل صغير، وروت والدة الطفل الواقعة .

وقالت والدة الطفل،" الفيديو اللي قدامكوا ده انا هحكيلكوا فيه كل اللي حصل بالتفاصيل في حضانه Baby World  اللي في حدائق حلوان  .. يوم الخميس 21/11 ابني اللي عنده سنتين ونص ولسه كلامه بسيط راح كيدز اريا مع الحضانة وبالنسبالي انا كنت واثقه ف الحضانه جدا وكمان الكيدز اريا دي روحناها كذا مره يعني المكان كله لعب تناسب سنه ..الساعه 3 الا ربع باباه راح يجيبه من الحضانة الاستاذه صاحبه الحضانه الفت موضوع و قالت لباباه سليم تعب وودوه المستشفي بسبب انه كان مدروخ شويه من اللعب وخوفنا يكون جاتله ضربت شمس و الحمدلله الولد طلع كويس وباباه فضل يقولها و مكلمتناش ليه تقوله محبتش اقلقكوا والموضوع عدي وانا لما عرفت كلمتها وسالتها قالت نفس الكلام".

وتابعت والدة الطفل ،" وقعدت تحلفلي ان ابني محصلوش حاجه النهارده وكانت بتسال اللي حواليها بتقولها هو سليم حصله حاجه النهارده قالتلها لا الولد محصلوش اي حاجه وقفلنا المكالمه ع كده وصدقت بس بعد ما ركزت مع ابني لقيت رقبته عليها علامه حمره بارزه من قدام شكلها واضح اوي كلمتها تاني مره سالتها ابني اتخبط او وقع تقولي لا ونفس الكلام برضه سالتها ورقبته مالها تقولي ابنك شد رباط السويت شيرت جامد وابقي شيليه قفلت معاها وحاسه ان برضه في حاجه غلط".

واستطردت والدة الطفل،" ابص الاقي رقبته من ورا كمان نفس العلامه و السويت شيرت كان مقطوع حسيت ان لا مش طبيعي روحنا انا وباباه ع الحضانة تاني كنا متاكدين ان في حاجه مش طبيعية باباه اللي اتكلم قالها انا عايز اعرف ابني حصله ايه النهارده !! قالتله انا منهاره بجد وهقولكوا اللي حصل ابنك وهو بيتزحلق رباط السويت شيرت مسك في الزوحليقه و اتعلق من رقبته بس احنا لحقناه و جرينا بيه بس والموضوع مكملش ثواني وده مش اهمال وفضلت تحلف انها مأهملتش فيه وشافته ع طول سالناها والكيدز اريا فيها كاميرات قالت للاسف لا ".

وتابعت ،"باباه في وقتها راح عمل محضر اهمال وراح المستشفي قابل الدكتور وعرف انها اصلا محكتش للدكتور اللي حصل لابني هي قالتله نفس اللي قالتهولنا انه فرهد من اللعب انتوا متخلين انها حتي الدكتور مقلتلهوش الحقيقه !!!تاني يوم اللي هو الجمعه كلمنا الكيدز اريا وعرفنا ان فيها كاميرات عادي و روحنا هناك الحمدلله الناس هناك كانت امينه جدا وورونا الكاميرات وصورنا كمان الفيدييو وصاحب المكان كان متعاون جدا هو وكل الاستف الفيديو قدامكوا اهو

وقالت" انا ابني اتساب اكتر من 3 دقايق متعلق من رقبته فضل يعافر دقيقه لحد ما غاب عن الوعي خالص و لمده دقيقتين مغمي عليه ولا حد شايفه رايحين جايين وماحدش بص عليه لولا ستر ربنا ان طفله صغيره هي اللي تشوفه انتوا متخيلين اتشاف بعد قد ايه!!  و شايفين المدرسات واقفين بيعملوا ايه يعني مش مركزين مع اطفال تانيه مثلا ف مشافهوش لا هما واقفين بيتكلموا مع بعض وماخدوش بالهم ان في طفل من ضمن الاطفال اللي معاهم غاب عن عينهم لمده 4 دقايق بالتقريب يعني الموضوع محصلش ف ثواني زي ما الاستاذه قالت لا وكمان بعد تأليف موقف غير اللي حصل وانها استغلت انه مش هيقدر ييجي يحكي

واستطردت،" بس لا انا ابني كان بيموت وكان بيعافر لحد ما خلاص مقدرش واستسلم ابني بينام يعيط و بيحلم بكوابيس ومش عارف ينام حسبي الله ونعم الوكيل في اي حد مسؤل عن اللي حصل لابني واحنا مش هنسامح في حق ابننا ولا هنسكت غير لما كل الناس تعرف باللي حصل ".