استغاثت الفنانة راندا البحيري بسبب الضرائب الجزافية الواقعة عليها، بالرغم من قيامها بسداد جميع ضرائبها، وذلك من خلال منشور عبر حسابها الشخصي على موقع التواصل الاجتماعي فيسبوك.

راندا البحيري تستغيث بسبب الضرائب

وكتبت راندا البحيري في منشورها الذي يرصده موقع تحيا مصر: الشركة المتحدة للخدمات الإعلامية.. السيد نقيب المهن التمثيلية تحية طيبة وبعد.. هذا ليس بيان شجب ولا شكوي ولا أي شئ آخر، كل ما في الأمر عرض موضوعي على حضراتكم، لقد حوربت بداخل شركات الإنتاج المصريه وتم منعي من العمل بدون إبداء أسباب وبالفعل بعد أكتر من بروفه ل لأكتر من عمل وأكتر من محاولات لدخولي أعمال فنية بلاقي نفسي فجأة اتشالت منها ومش فيها والعمل بيكمل من غيري.

وتابعت راندا البحيري الكلام ده بيحصل بالظبط بقاله أكتر من ٧ سنوات وبيحاولوا فيه بقالهم اكتر من ١٣ سنه بمساعدة أحد الأشخاص خارج المجال الفني، وليس هذا صلب الموضوع أبداً، أنا بتعرض بقالي اربع سنين دلوقتي لضغط لا يمكن لواحدة ست تقدر تتحمله لوحدها، أنا مشتكتش ولا خليت شكل الفن والفنانين وحش والتزمت الصمت وبقالي سنين بحاول اشتغل في مشاريع وفيه منها اللي ربنا كرمني فيه وفيه منه اللي علشان عدم خبرتي الكبيرة انذاك أتنصب علي فيه يعني بسبب ان مفيش عدل في المنظومة أتنصب علي في فلوس كنت شغاله بيها وجايباها ب تعب كبير جدا.

راندا البحيري تستغيث: محطوط عليا ضرائب جزافية بالرغم من أني مش بشتغل في التمثيل

واستكملت راندا البحيري: كنت طول عمري شخص ماشي صح جدا فيما يخص الأوراق و حق الدوله وضرائبي كلها مدفوعة من ٢٠٠٤ يعني بقالي ٢٠ سنة بدفع للضرائب واظن لو أنا شخص مش ماشي صح مع الضرائب كان من زمان هتلاقي حد قال راندا مدفعتش أو معملتش او كذا وكذا، ومحدش أصلا يقدر يشكك في حبي لبلدي الشديد ووطنيتي وفي نزاهتي الحمد لله رب العالمين.  

واستطردت: اكتشفت من فترة أنهم حاطين عليّ ضرائب جزافية بالرغم من اني مبشتغلش في التمثيل أصلا و كل ما اكلم حد في المبني بيقولي اصل الممثلين كلهم حصل معاهم كده مش انتِ بس، طب أنا بتكلم عن نفسي، اتكلمت مره و اتنين وكلمت نقيبي السيد أشرف ذكي وهو أداني نمرة تليفون الأستاذة مها المختصة عن الممثلين أمام الهيئة العامة للضرائب بحيث أنها تفهمهم وقالي ان الموضوع ده هيخلص لان الممثله دي حاليا لا تعمل بالتمثيل ف مش هينفع اننا ندفعها فلوس قديمه هي أصلا دفعتها قبل كده.

راندا البحيري: يتم تهديدي يوميا بالحجز على أموالي

واضافت راندا البحيري: وبالمستندات احنا أنا والمحاسب الضريبي المحترم اللي شغال معايا دفعنا الفلوس اللي علينا من قبل ٢٠٠٥ كل سنة بندفعها في سنتها انما، هم مرة واحدة عايزينك تدفع ضرائب جزافية هم اللي حسبوها من غير ما يرجعولك واضطريت في المره الأولي نظراً لحبي لبلدي و احترامي لكيان الفنان المصري و عدم اهتزاز صورته امام المصريين و العرب اني امضي علي رقم كبير جدا مع اني متأكده ان أنا مش المفروض ادفع الكلام ده علي وعد منهم السيد عمرو حجازي و السيد احمد عبد الغني اني هدفع اصل المبلغ و مش هدفع غرامات علي المبلغ ده.  

واردفت راندا البحيري: وبالفعل وقفوا غرامات و بقالي كذا سنه بقسط المبلغ ده للضرائب لحد الحمدلله ما خلصته كله، فوجئت بعد ما المبلغ خلص اولاً ب مبني القيمة المضافه بيكلمني عايز يدفعني غرامة بالرغم من انهم وعدوني مفيش غرامات.. و الغرامه دي اكتر من المبلغ نفسه اللي بقسطة بقالي سنتين ثم اتصال من كذا مأمور ((ضرائب عامه)) طالبين مني فحص كل سنين العمل اللي اشتغلتها، افحص ٢٠٠٦ اللي ورقها بقي لونه اصفر ؟؟؟؟؟ وطالبين اني ادفع من ٢٠٠٦ لحد ٢٠٢٤ يعني ١٨ سنه ضرايب أنا دافعاهم أصلا قبل كده، قولتلهم أنا دفعت ده، قالولي مينفعش قولتلهم ايه هو اللي مينفعش قالولي اصل احنا واخدين تعليمات ان كل الممثلين يدفعوا أزيد من اللي دفعوه، قولتلهم التعليمات دي منين ؟؟ محدش رد، قالولي كده كده هتدفعي حتي لو دفعتي قبل كده.  

وتابعت راندا البحيري: مع الضغط عليّ اضطريت اني اعمل جلسات مع الضرايب لحد ما كل الناس هناك بقوا يشوفوني يومياً و بجد فيه ناس تعاطفت جدا مع موضوعي لأنهم بالفعل شايفينني دفعت قبل كده، إلا مختصة الحجز كل يوم بتكلمني (((أنا هحجز عليكي)))، أنا اول مره أشوف موظف بيتصل ب عميل الساعه ٨ بالليل بعد مواعيد العمل علشان يقوله أنا هحجز عليك يتم تهديدي يوميا بالحجز علي أموالي يتم تهديدي يومياً بالضرايب مع اني دفعت كل ضرائبي لحد آخر عمل عملته، يتم تهديدي يوميا بالضرايب مع اني لا اعمل مع المتحده و لا غيرها.

راندا البحيري: فقدت الشغف كممثلة ومش عايزة اشوف وش الكاميرا تاني

واختتمت راندا البحيري: السيد نقيب المهن التمثيلية الساده المسئولين عن الإنتاج في مصر ارحموا الممثل المصري ارحمونا وبجد بجد والله ما بطلب شغل أنا أصلا فقدت الشغف كممثله و مش عايزه أشوف وش الكاميرا دي تاني، أنا فعلا كل اللي طالباه إنكم تسيبوني في حالي، بس مش اكتر، يا أسيادنا أنا عايزه اكمل حياتي في مصر مش عايزه أدور علي شغل برا و لا عايزه أعيش في حته تانيه ليه مصممين تزقونا كلنا ندور علي حياتنا في حته تانيه أنا قاعده هنا.