هل الدهب أنواع ولا نوع واحد بس، وهل في دهب مصري وأمريكي وتركي وخليجي، طب إيه هي أنواع الدهب وإيه أفضلها.. هنقولك كل التفاصيل في الفيديو ده. 
 

طبعا الدهب أشكال وأنواع وتصمايم مختلفة، عشان كده في اللي بيشتري مشغولات زي غوايش حديثة مواكبة للعصر، وفي كمان اللي بيروح على القديم زي السلاسل الجنزير والكردان والحلق الدايرة.

وأشكال الدهب بتختلف من بلد للتاني وفقا للذوق العام والتقاليد والعادات، ومع اختلاف العادات وأسلوب الحياة بتختلف أشكال وتصاميم المشغولات الذهبية، كمان بينوع الذهب حسب اللون والمواد المضافة، و لأغراض المختلفة اللي بتُستخدم فيها كل نوع من المجوهرات، وكل ده بيتيح للمستهلكين خيارات كتيرة تناسب أذواقهم واحتياجاتهم المختلفة.

ونيجي لأنواع الدهب في السوق، فمنها الدهب التركي، اللي بيتميز بعياراته المختلفة، وغالبا بيكون من عيار 22 أو 24، وبيتميز بلونه الأصفر الفاتح.

والتصميم التركي للدهب بيجمع بين البساطة والفخامة، مع دمج تأثيرات من الثقافات الشرقية والغربية، وكمان بيتميز بالزخارف الهندسية والنقوش النباتية.

ومن الدهب التركي للدهب الإيطالي، اللي معروف بجودته العالية وعادة يكون من عيار 18، وبيتميز بلمعانه الفائق ومقاومته للخدوش.

والدهب الإيطالي ده بيتمتع بتصاميمه الفاخرة والمبتكرة اللي بتجمع بين الكلاسيك والعصري، وبيشتهر بتقنيات تصنيعه المتقدمة زي الحفر الدقيق والتشكيل بالنحت، كمان متاح بأوزان خفيفة.

نيجي بقى للدهب المصري ومميزاته، اللي هو بيتصنع في مصر، وغالبا بيكون من عيار 21 وعيار 18، لكنه بيتميز بوجود العديد من الأشكال والأذواق اللي بتناسب جميع الفئات، كمان بيتميز بتصاميم حديثة بتتماشي مع التصميمات العالمية.

وبعد ما استعرضنا أنواع الدهب، هنقولك هنقولك على الأسعار انهاردة رايحة على فين.

في الحقيقة أسعار الدهب في مصر، استقرار في السوق، وعيار 21 الأكثر تداولًا سجل 3595 جنيه، وجرام 24 حوالي 4108.57 جنيه.

أما عيار 18 فحافظ على استقراره وسجل نحو: 3081.43 جنيه، والجنيه الدهب ب نحو 28760 جنيه.

لازم تعرف سعر الدهب انهاردة عامل كام من خلال الإنترنت أو إن حضرتك تتنقل بين التجار وتشوف سعر اليوم، وماتنساش كمان تسأل على قيمة المصنعية.

يفضل عند الشراء، حضرتك تختار عيار21 لانه الأقل مصنعية عند البيع، بس ماتنساش تختار تاجر ذهب موثوق فيه وسمعته كويسة.

ماتنساش، تتجنب شراء الدهب الفصوص، أو تتأكد إن الفصوص الموجودة في المشغولات الذهبية في الفاتورة عشان ماتخسرش كتير في حالة البيع.

خليك حريص على اختيار الأشكال قليلة النقوش عشان مصنعيتها قليلة، ويفضل تشتري سبيكة في حالة الاستثمار أو ادخار الفلوس

وإياك تنسى تتأكد من الأختام الموجودة على الدهب، وأخيرا لازم تعمل فاتورة ضريبية باللي اشتريته، عشان مايضحكش عليك.