هو ليه البنوك بتراهن على حسابات التوفير بالذات؟ إيه الميزة الكبيرة اللي بتقدمها للبنك والعميل في نفس الوقت؟ وهل ممكن تكون هي الحل السحري للتحكم في تكلفة الأموال مع قرب خفض أسعار الفائدة؟.. تعالوا نفهم مع بعض التفاصيل اللي ممكن تغير طريقة تفكيرك عن الادخار في البنوك

في الفترة الأخيرة البنوك المصرية بدأت تراهن بشكل كبير على حسابات التوفير كواحدة من أهم أدواتها لجذب المدخرات والتحكم في التكلفة

طيب إيه القصة؟ وليه الحسابات دي بالذات؟

الفكرة ببساطة إن مع توقعات خفض الفائدة قريبًا البنوك بتدور على منتجات توفر سيولة سريعة وتكلفة أقل مقارنة بالشهادات طويلة الأجل اللي بتحتاج التزام بعوائد مرتفعة لفترة طويلة.. وحسابات التوفير بتقدّم ميزة مزدوجة بالنسبة للعميل هو بيستفيد من مرونة عالية جدًا في السحب والإيداع في أي وقت ومع ده بيفضل يكسب فايدة على فلوسه و بالنسبة للبنك الحسابات دي بتديله سيولة مستمرة وسهولة في التحكم في تكلفة الأموال حسب تغير أسعار السوق يعني لما الفائدة تقل البنك يقدر يعيد تسعير الفايدة بسهولة من غير ما يكون ملتزم بفائدة ثابتة طويلة الأجل زي الشهادات

وخلينا نبص على أمثلة واقعية لبعض حسابات التوفير اللي البنوك طرحتها.. المصرف المتحد مثلا بيقدم حساب "الصفوة" بعائد سنوي يصل لـ30%، لكن بشروط معينة زي رصيد حساب بحد أدنى 500 ألف جنيه.. كمان بنك QNB عنده حساب توفير بلس بفائدة تتراوح بين 5% و23.5% حسب رصيد الحساب والحد الأدنى هنا أقل شوية بيبدأ من 20 ألف جنيه.. ومصرف أبوظبي الإسلامي الفائدة بتوصل لـ25%، لكن بشروط زي حد أدنى 250 ألف جنيه.. وبنك الكويت الوطني العائد ممكن يوصل لـ25%، مع حد أدنى 250 ألف جنيه لاحتساب العائد

كل بنك بيحاول ينافس بتقديم عوائد جاذبة عشان يجذب شريحة أكبر من العملاء لكن في نفس الوقت بيحاول يتحكم في التكلفة عن طريق شروط مرتبطة برصيد الحساب أو دوريات صرف العائد

ومع ترقب خفض الفائدة اللي ممكن يوصل لـ12% بشكل تراكمي خلال 2025 وفقًا لتقرير "فيتش سوليوشنز" البنوك بتحتاج حلول ذكية للتحكم في تكلفة الأموال.. وحسابات التوفير والشهادات متغيرة العائد بيكونوا اختيار مثالي هنا لأنهم أقل تكلفة مقارنة بالشهادات ثابتة العائد اللي بتُلزم البنك بدفع عوائد مرتفعة لفترات طويلة

مصادر مصرفية قالت إن إدارات الخصوم والأصول في البنوك شغالة دلوقتي على دراسة إعادة تسعير العائد على منتجاتها الادخارية أو الإبقاء عليها لفترة أطول حسب وضع السوق.. وده لأن تكلفة الأموال ومعدلات السيولة ومستويات التوظيف كلها بتلعب دور مهم في اتخاذ القرارات دي.. والبنوك بتستهدف دلوقتي التركيز على جذب السيولة في شكل أرصدة جارية أو حسابات توفير لأنها بتسمح للبنك بمزيد من المرونة والسيطرة على تكاليفه

وخليني فى النهاية أقولك ان حسابات التوفير مش مجرد مكان تحط فيه فلوسك وتنسى هي أداة مهمة بتخدم العميل والبنك في نفس الوقت.. و السؤال اللي ممكن نسأله هل البنوك هتستمر في رفع الفائدة على حسابات التوفير لفترة طويلة ولا هيكون في تغيير قريب مع انخفاض الفائدة المتوقع؟ الأيام الجاية هي اللي هتجاوب على كل الأسئلة دي