أثار نجم الزمالك السابق أحمد حسام ميدو، جدلاً واسعاً بتصريحاته الأخيرة حول عدم تشجيعه لفريق الأهلي في بطولة كأس العالم للأندية.

وقد دافع ميدو عن موقفه هذا عبر حسابه الرسمي، موضحاً أسباب تصريحه والهجوم الذي تعرض له.

وأكد ميدو في تصريحاته على حبه الشديد لنادي الزمالك وانتمائه له منذ الصغر، مشيراً إلى أنه بدأ مشواره الكروي في نادي الزمالك وهو في التاسعة من عمره. وأوضح أن تربى على حب الزمالك واحترام المنافسين في نفس الوقت.

وكتب ميدو عبر حسابه الرسمي بموقع التواصل الاجتماعي “فيس بوك”: “‏أنا ابن ‎الزمالك وأكبر فخر ليا في حياتي أني ابن المدرج ابن التالتة يمين بلعب في الزمالك من وأنا عندي ٩ سنين وأنا عيل صغير كنت بروح بفانلة الزمالك في المواصلات علشان الناس كلها تعرف أني ناشئ في الزمالك”.

وتابع: “بطاقتي وأنا عيل صغير هي كارنيه اتحاد الكورة اللي مكتوب عليه اسم الزمالك.. تتلمذت على إيد مدربين عظماء علموني أني انتمي لفريقي بس وما أشجعش أي نادي تاني في مصر بالذات إلا نادي الزمالك أي كان بيلاعب مين ولكن في نفس الوقت اتربيت أني احترم كل المنافسين وأهنيهم لو كسبوا وأباركلهم واقولهم هارد لك لو خسروا”.

وأضاف: “هو ده معنى الروح الرياضية بالنسبة لي!! لما اتسألت في الإستوديو هتشجع الأهلي في كأس العالم للأندية رديت بطبيعتي دون أي نفاق أو كذب لأن بكل بساطة مفيش حاجه في الدنيا تستاهل أنك تكون كذاب ومنافق اتفق معاكم أن التوقيت ما كانش مناسب وبعتذر لأي حد زعل أني قلت الكلام ده في حدث مهم يخص النادي ‎الأهلي وأنا شايف الناس اللي زعلت بخصوص أن الوقت مش مناسب عندهم كل الحق”.

وأردف: “اما لو اتسألت مليون مرة هتشجع اي نادي تاني في مصر غير الزمالك إجابتي هتكون هي هي عمرها ما هتتغير لغاية لما أموت..أما بخصوص الهجوم اللي بتعرضله فأنا عاذر الناس لأنهم ممكن يكونوا اتعودوا على إجابات مختلفه في السنوات الأخيرة من ناس تصدروا المشهد في الإعلام وهما أكتر ناس بيأذوا المنافس في الخفاء وأكتر ناس بتتمنى من قلبها خسارة المنافس من جواهم”.

واختتم: “مش هرد على أي حد هاجمني لأن بكل بساطة أنا في مرحلة في حياتي شايف أن مفيش حاجه في الكورة تستاهل الخصومة والخناق بالعكس الكورة اتعملت علشان نتسلى بيها ونستمتع بيها ونناكف بعض شوية بس بالنسبه لي ماتتعداش أكتر من كده!! مرة ثانية بعتذر إني كنت سبب في جدال قائم الأيام اللي فاتت للأسف مش ذنبي ولكن بسبب مدمنين الترند والدخلاء على كرة القدم اللي لايمكن يفهموا أبدا عقلية مشجع الكورة!!.