يا ترى ليه صندوق النقد الدولي أجل المراجعة الرابعة لبرنامج مصر الاصلاحي من أكتوبر لنوفمبر؟ وهل فيه خلافات بين مصر والصندوق؟ ولا السبب مجرد انشغالات مؤقتة؟ وايه معنى تصريحات رئيس الوزراء مصطفى مدبولي عن سبب التأجيل؟

في خطوة مفاجئة أعلن صندوق النقد الدولي عن تأجيل المراجعة الرابعة لبرنامج الإصلاح الاقتصادي الخاص بمصر من أكتوبر إلى نوفمبر.. الكلام ده جه على لسان الدكتور مصطفى مدبولي، رئيس مجلس الوزراء، في مؤتمر صحفي عقد مؤخرا في العاصمة الإدارية.. وفيه أكد إن السبب وراء التأجيل كان برغبة الصندوق بسبب انشغاله في الإعداد للاجتماعات السنوية المقررة من 21 إلى 26 أكتوبر.

طب ليه صندوق النقد مهتم بالاجتماعات دي؟

الاجتماعات السنوية للصندوق بتجمع الدول الأعضاء لمناقشة القضايا الاقتصادية المهمة.. وزي ما قال رئيس الوزرا ء محافظ البنك المركزي حسن عبدالله ووزير المالية أحمد كجوك، بالإضافة إلى وزراء المجموعة الاقتصادية، هيكونوا حاضرين في الاجتماعات دي.. وده بيعكس اهتمام الصندوق بالتعاون مع مصر، لكن في نفس الوقت بيُظهر إنه مش هيتجاهل الأمور التانية

طب هل تأجيل المراجع الرابعة بيعني وجود خلافات؟

مدبولي طمأن الجميع إن كل المستهدفات الموضوعة لمصر تحققت، مما يشير إلى أن العلاقات بين مصر وصندوق النقد الدولي جيدة.

والحقيقة مفيش أى خلافات حاليا بين مصر وصندوق النقد .. بل بالعكس الصندوق خفف عدة شروط في حزمة الدعم المالي البالغة 8 مليار دولار لمصر بما فيها السماح للحكومة المصرية بمزيد من الوقت لتنفيذ الإصلاحات.

والصندوق وافق كمان على على تأجيل نشر عمليات التدقيق السنوية على الحسابات المالية اللي بيصدرها الجهاز المركزي للمحاسبات حتى نهاية نوفمبر بدلا من الموعد الأصلي في نهاية مارس اللى فات مع انتظار تعديل القانون اللي بيحكم عمل الجهاز.

طب التأجيل ده هيكون ليه أى تداعيات سلبية على مصر؟ 
مفيش اى تاثيرات سلبية على الاقتصاد المصري من تأجيل المراجعة كل الحكاية الفلوس بتاعت الشريحة الرابعة واللى بتوصل الى مليار و300 مليون جنية هنتأخر شوية فى استلامها وممكن ده يحصل مع اول 2025 لأن المراجعة هتنتهي فى اكتوبر وهيفضل صرف الشريحة الرابعة معلق لغاية اجتماع المجلس التنفيذي للصندوق فى نهاية ديسمبر

لكن الوضع الاقتصادي الحمد لله حتى الآن مستقر وفيه قطاعات كتيرة بدأت تتعافى بشكل واضح وان كان فيه قطاعات وموارد تانية للعملة الصعبة اتأثرت بشدة زي قناة السويس اللى عوايدها تراجعت بأكتر من 60% وفقا لتصريحات رئيس هيئة قناة السويس الفريق أسامة ربيع

وخد بالك رب ضرة نافعة .. التأجيل ده ممكن يكون فرصة لمصر عشان تركز على تنفيذ السياسات الاقتصادية بشكل أفضل وتقديم نتائج إيجابية.. لأن بالرغم من التحديات مصر مستمرة في مسار الإصلاح، وصندوق النقد الدولي في صفها. ومن الواضح إن فيه رغبة حقيقية للتعاون وتحقيق الأهداف الاقتصادية المشتركة.