ايه الرسائل الخاصه اللي وجهها الرئيس السيسي للمصريين في الساعات الأخيرة والرئيس قال إيه عن الاقتصاد والمخاطر اللي بتحيط بمصر من كل اتجاه.. خليكم معانا للآخر وهتعرفوا التفاصيل في التقرير  ده

 
الرئيس السيسي في الساعات الأخيرة اجتمع مع قيادات من القوات المسلحة والشرطة والمخابرات العامة ومسؤولين من الحكومة وأهمية اللقاء ده إنه جاي في وقت حساس وخطير جدا بتمر بيه المنطقة اللي حولينا والتحديات اللي بتواجه مصر باعتبارها جزء أساسي من إقليم مشتعل وغرقان في الفوضى واللي بيدل على أهميته إنه عقد في مركز قيادة الدولة الاستراتيجي بالعاصمة الإدارية الجديدة وهو المركز اللي بيدي ايحاء لأهمية اي اجتماع بيعقد فيه.

الرئيس السيسي بعد اللقاء واللي ناقش فيه مع الحضور كل التفاصيل الخاصة بالأوضاع الخطيرة اللي حولينا وازاي مواجهتها عقد مؤتمر مع الاعلاميين والصحفيين وقال كلام مهم جدآ وخاصة بموضوع الوضع الاقتصادي وازاي مصر عبرت المرحلة الأصعب في برنامج الإصلاح الاقتصادي وقال الرئيس السيسي حاجة مهمة جدا وهو إنه مصر قادرة وعندها كل الإمكانيات عشان تدافع عن أمنها واراضيها ودي رسالة مهمة جدا من أكبر مسؤول في البلد وهو راجل عسكري في الأساس للمصريين أنهم يطمنوا ومايخافوش على بلدهم لأن مصر عندها من القوة أنها تسحق اي مغامر .

لكن الأهم في كلام الرئيس السيسي في المؤتمر لما قال إنه مطمن من وعي المصريين وفاهمين الخطر اللي بيواجه بلدهم واستحملوا الأوضاع المعيشية الصعبة في سبيل بلدهم ولتفويت الفرصة على اي محاولات للفتنة واستغلال الأوضاع للتحريض ودا بيظهر ذكاء المصريين واحساسهم بالخطر على بلدهم وأنهم في الخطر ايد واحدة وكتلة صلبة ودا أهم حاجة في مرحلة خطيرة زي اللي بتمر بيها المنطقة وتأثيرها على مصر وأكد الرئيس السيسي أن الدولة مش بتدخر جهد عشان تخفف عن المواطنين وكمان كلامه إن مصر عبرت الاصعب في الإصلاح الاقتصادي معناه أن اللي جاي هيكون أفضل بكتير من اللي راح .

طيب ليه الرئيس عمل الاجتماع المهم دا دلوقتي وسر تصريحاته الأخيرة ؟
لأن الرئيس راجل عسكري وراجل مخابرات وخبرة في تقدير المواقف الاستراتيجية عارف إن الخطر كبير على البلد وعارف أن الناس قلقانة خاصه من الوضع الاقتصادي ومن اللي بيحصل حولينا فحب يوجه رسالة قوة وطمأنينة للشعب المصري وعشان كمان منصات التواصل الاجتماعي بقت مليانه بالأخبار والتحليلات المضللة والاشاعات اللي بتبثها ليل نهار منصات جماعة الإخوان الإرهابية خاصه بعد اللي حصل في سوريا ومحاولة تخويف المصريين فكان لازم الرئيس يطلع ويفكر المصريين أن الدولة عندها من القوة لمواجهة أي خطر أو تآمر وإن وراها جيش وشرطة وأجهزة أمنية قوية وصلبة وقادرة تقلب اي خطر على الدولة.