هي إيه قصة حفر آبار بترول وغاز جديدة، وليه وزارة البترول أعلنت عن خطة من العيار الثقيل لتعظيم اكتشافات حقول البترول والغاز الطبيعي وغيرها من مصادر الطاقة، وامته توصل لهدفها؟

في الفترة الأخيرة، وزير البترول والثروة المعدنية المهندس كريم بدوي،، أكد إن الوزارة دلوقتي بجذب الاستثمارات في مجال الطاقة، خاصة في ظل التوجهات العالمية للتحول إلى مصادر الطاقة النظيفة.

عشان كده، بيتم دلوقتي حفر حوالي 100 بير بترول وغاز عشان نزود ونعظم إنتاجنا من مصادر الطاقة، وكمان نخفض الفاتورة الاستيرادية، ونرفع نسبة الاحتياطيات اللي عندنا من مصادر الطاقة.

وبالنسبة للي بيحصل دلوقتي، فتم توقيع 15 اتفاقية بقيمة 20 مليون دولار منح توقيع، عشان نحفر 46 بئر جديد، وكمان هيتم ضخ 748.5 مليون دولار للاستثمارات في قطاع البترول والطاقة، وده لأن الحكومة دلوقتي بتهتم جدا بقطاع الطاقة وبتعطيه الأولوية ضمن خطط التنمية الاقتصادية، وده بيترجم في دعم مشروعات الطاقة المتجددة وتطويرها.

ومش بس كده، ده كمان بيتم دلوقتي العمل على تنفيذ مشروعات واعدة في مجالات الطاقة المتجددة، وي مشروعات الهيدروجين الأخضر، اللي بتعتبر من أهم ركائز التحول الطاقي في البلاد، وكمان قطاع البترول والكهرباء شغالين لتعظيم الاستفادة من المشروعات دي وتحقيق أكبر قدر من الاستدامة البيئية.

كمان، حاليا بيتم العمل على تعزيز التعاون الإقليمي لجذب الاستثمارات في مصر والمنطقة، وده طبعا بهدف دفع نمو الاقتصاد المصري والاستفادة من موقع مصر لإنتاج الهيدروجين وتجارة الطاقة.

وبيتم دلوقتي، التنسيق لتأمين شراء الوقود اللازم وسداد مستحقات شركاء الإنتاج والاستكشاف، بالإضافة إلى التعاون مع مجلس النواب والشيوخ ممثلين في لجان الطاقة والبيئة ولجنة الصناعة لدعم عجلة الاستثمار عن طريق الاتفاقيات وإصدار القوانين الخاصة بها.

أما على صعيد آبار الغاز، فتم حفر 77 بئر غاز خلال أول 10 أشهر من سنة 2024.

ومن هنا، قال وزير البترول، إنه تم دعوة أكثر من 20 مستثمر مصري في سبتمبر اللي فات، للعمل في مجال تنمية الحقول المتقادمة لزيادة الإنتاج منها، واستجاب عدد منهم عن الاهتمام بالفرص دي.

كمان، تم توقيع عدد من مذكرات التفاهم وبيتم دلوقتي اتخاذ الخطوات اللازمة، بجانب جذب أطراف جديدة من القطاع الخاص المصري للاستثمار في قطاع البترول والثروة المعدنية.

ونقدر نقول، إن عدد الشركات في مجال البحث والاستكشاف والإنتاج وصلت إلى 57 شركة، منها 8 من كبرى الشركات العالمية و6 شركات مصرية متخصصة، وأكثر من 12 شركة عالمية متخصصة في مجال الخدمات البترولية والتكنولوجية، وأغلب الشركات دي شغالة في السوق المصري، وكمان في الفترة الجاية هيتم إطلاق حزمة الحوافز مع الشركاء لتعزيز أنشطة إنتاج مصادر الطاقة في مصر.

وبالنسبة للآبار الاستكشافية والاكتشافات المتحققة منذ يناير لحد أكتوبر اللي فات، فوصلت ل 77 بئرا ومنها 54 كشف محقق، و40 كشف زيت و14 للغاز، وحققنا حوالي 71 مليون برميل زيت و680 مليار قدم غاز.

كمان، تم في الفترة من يوليو وحتى نهاية ديسمبر الحالي، حفر آبار استكشافية بغرب البحر المتوسط، وجار التنسيق عشان نبدأ المرحلة الثالثة لمنطقة خليج السويس والبحر الأحمر، وقريب هيتم إسناد مناطق جديدة منها 8 حقول متقادمة بخليج السويس والصحراء الشرقية و4 مناطق استكشافية بالصحراء الغربية، و5 مناطق استكشافية بخليج السويس والصحراء الغربية ضمن مزايدات الهيئة العامة للبترول.

طبعا كل ده أكبر دليل على إن خطة مصر لزيادة الاستكشاف البترولية ماشية زي الفل، واننا في طريقنا لتنويع مصادر الطاقة اللي بننتجها، عشان تكفي الاستهلاك المحلي سواء من الغاز ولا البترول، وكمان نصدر للخارج وندخل فلوسك بمليارات الدولار للخزينة المصرية، وهو ده المطلوب بالظبط.