ايه هو صافي الأصول الأجنبية في البنك المركزي المصري وايه الفرق بينه وبين الاحتياطي النقدي في المركزي وليه صافي الأصول عامل مهم جدا في إدارة السياسة النقدية وايه علاقته بالديون الخارجية وايه المفاجأة اللي أعلنها البنك المركزي في الساعات الأخيرة.. خليكم معانا للآخر وهتعرفوا التفاصيل في الفيديو ده.

الحقيقة البنك المركزي المصري بقيادة المصرفي المخضرم حسن عبد الله بيعمل  عظمة في إدارة السياسة النقدية وتنظيم عمل البنوك وتوفير العملة الصعبة للدولة وقدر يواجه أخطر أزمة في الدولار ويقطع الطريق على محاولات إسقاط مصر ماليا من خلال دفن السوق السوداء للعملة بعد قرار التعويم المفاجئ في مارس اللي فات وقدر يوفر الدولار للاستيراد ولسداد اقساط الديون وفي نفس الوقت قدر يرفع الاحتياطي النقدي لرقم تاريخي شارف على 47 مليار دولار ودا في عز أزمة نقص الدولار اللي مرت بيها مصر منذ عام 2022.

وكل يوم البنك المركزي المصري بيفاجئنا بأرقام سارة بتؤكد قوة مصر ماليا وصلابة منظومة البنوك وفي الساعات الأخيرة كشفت ارقام البنك المركزي عن تحقيق صافي الأصول الأجنبية للبنك المركزي فائض للشهر السابع على التوالي بقيمة 11.792 مليار دولار بنهاية نوفمبر بما يعادل 585.36 مليار جنيه، مقابل 10.6 مليار دولار بنهاية أكتوبر2024 بما يعادل 520.121 مليار جنيه.

وعشان تبقي عارف صافي الأصول الأجنبية لدى البنك المركزي بيعتبر أحد أهم مقاييس الاستقرار والصلابة المصرفية لانه ليظهر الفرق بين أصول البنك المركزي والتزاماته من العملات الأجنبية.

طيب ايه هو صافي الأصول الأجنبية في البنك المركزي المصري ؟
شوف حضرتك  صافي الأصول الأجنبية هو ما تملكه البنوك من ودائع ومدخرات بالعملات الأجنبية وخاصة الدولار الأمريكي ويكون قابل للتسييل في الأوقات اللي بيحتاج فيها البنك إلى سيولة لسداد التزاماته بالعملة الصعبة يعني تقدر تقول عليه احتياطي نقدي من نوع خاص وتحت الطلب لكن بيختلف عن الاحتياطي النقدي العادي في البنك المركزي واللي بيعتبر ملكية صافية وخالصة للدولة وبيكون ليه اهداف تانية زي تغطية احتياجات مصر من السلع واستخدامه في الازمات مثلا .

وبالعودة للأرقام هتلاقي إن البنك المركزي سبق وكشف خلال مايو الماضي عن تحول صافي الأصول الأجنبية للمركزي من العجز لتحقيق فائضا لأول مرة منذ مارس 2022 وحقق صافي الأصول الأجنبية فائضا بقيمة ما يعادل 458.630 مليار جنيه بنهاية مايو 2024، مقابل عجز بلغ 36.070 مليار جنيه بنهاية أبريل.
يعني الخلاصة صافي الأصول الأجنبية بيعتبر شهادة ثقة في البنوك المصرية وفي النظام المصرفي المصري من ناحية ومن ناحية تانية شهادة ثقة في الاقتصاد المصري بشكل عام ودليل على مرونة سعر الصرف اللي اتبناه البنك المركزي المصري.