أكد الإعلامي مصطفى بكري أن الرئيس عبد الفتاح السيسي مستهدف لأنه قضى على مشروع الشرق الأوسط الجديد.

وقال بكري خلال برنامج "حقائق وأسرار" المذاع على قناة "صدى البلد": "النهاردة جيش مصر ورا القيادة السياسية لأن عندنا ثقة في القائد، والنهاردة جيش مصر ورا القائد الأعلى لأن النهاردة احنا بنخوض معركة والقائد يمضي في طريق احنا واثقين فيه، حكمة موضوعية ومصداقية ووعي بالمخاطر وعقلية عسكرية وراجل بيبني وبيسلح في نفس التوقيت، ومحافظ على توازن مهم جدا في إطار سياستنا العربية والخارجية".

وأضاف: "بلدنا بلد مؤسسات عارفين الدولة العميقة؟ دا في وزارات تمشي لوحدها ومحدش يقدر يلعب في إدارتها، محدش يقدر يلعب في البلد دي أقروا تاريخها وحضارتها".

وتابع: "بقول للي بيقلقوا من اللي رايحة واللي جاية، لا والله لو إسرائيل فكرت هنكسر رجلها هي واتخن منها، احنا عندنا وحوش رجالة وضربتلكم مثل ناسنا في قنا في عدوان 1956 جم وراحوا قصر عابدين لجمال عبد الناصر، وقالوا مستعدين نروح دلوقت ندافع عن بورسعيد".

وواصل: "عندنا ثقة في القيادة مش كلام اعتباطي ولا إنشائي ولا بوقين بقولهم لا دا إدراك ووعي ودراسة، أنتم لا تعرفون تاريخ هذا الرجل وازاي كان جنب المشير وبيعمل ايه من 25 يناير".

وأوضح: "انتوا متعرفوش هذا الرجل مستهدف ليه، ليه الأمريكان مستهدفينه ولية الصهاينة كل يوم والتاني بيتكلموا عليه، وليه بعض الناس واخدة موقف بلا مبرر لأنه قضى على مشروع الشرق الأوسط الجديد وعلى أداة مشروع الشرق الأوسط الجديد وهي الجماعة الإرهابية البلد دي بقوتها الصلبة والناعمة رقم لا يستطيع أحد تجاوزه".