يا ترى إيه قصة بناء أكبر مزرعة رياح في مصر، وإيه مكاسب مصر منها، هل هيبقي مشروع قومي زي أي مشروع تاني ولا مستثمرين داخلين بتقلهم في مجال الطاقة المتجددة في مصر.
في الساعات الأخيرة، البنك الأوروبي لإعادة الإعمار والتنمية أعلن عن ترتيب قرض مشترك بقيمة 275 مليون دولار أمريكي لبناء وتشغيل أكبر مزرعة رياح في أفريقيا، وقال إن المحطة دب هتكون تحديدا في مصر.
ومن هنا، القرض المشترك ده هيبقي قيمته 275 مليون دولار أمريكي، وهيكون مقدم مخصوص لمشروع محطة رياح السويس للطاقة، وهيتقسم كالتالي: 200 مليون دولار كقرض من البنك الأوروبي لإعادة الإعمار والتنمية، و75 مليون دولار كقرض من الفئة "ب" من البنك العربي وشركة ستاندرد تشارترد.
ونقدر نقول إن القرض ده هو خطوة دولية لتعزيز الطاقة المتجددة وتقنيات الكربون المنخفض في مصر، وهيشارك في تمويل مزرعة الرياح دي البنك الأفريقي للتنمية، ومؤسسة التمويل التنموي البريطانية للاستثمار الدولي، ومؤسسة التمويل التنموي الألمانية، وصندوق أوبك للتنمية الدولية، والمؤسسة العربية للاستثمارات البترولية.
أما قدرة مزرعة الرياح اللي هتكون في منطقة خليج السويس، هتبقى 1.1 جيجاوات، وهتوفر طاقة نظيفة ومتجددة بتكلفة أقل من تكلفة التوليد التقليدي للطاقة، ومتوقع إن المحطة دي تولد أكتر من 4300 جيجاوات من الكهرباء سنوياً، وهتقلل انبعاثات ثاني أكسيد الكربون السنوية بأكتر من 2.2 مليون طن، وكل ده هيساعدنا على تطوير قطاع طاقة في مصر.
ولأن البنك الأوروبي هو شريك التنمية الرئيسي في محور الطاقة ضمن برنامج "نوفي" اللي بيهدف لتحقيق التكامل بين الماء والغذاء والطاقة واللي تم الإعلان عنه في مؤتمر المناخ "كوب27"، فبيعتبر المشروع ده هو الأول في إطار برنامج "نوفي".
ومتوقع جدا إن محطة الرياح تساهم في الوصول لهدف 10 جيجاوات من الطاقة المتجددة اللي حددها برنامح "نوفي" وهيقدر يساعد الحكومة المصرية على خفض نسبة الكربون من قطاع الطاقة اللي بيهيمن عليه استخدام الوقود الإحفوري، وكمان هنقدر نحقق أهداف الطاقة المتجددة اللي بنسعى لها من فترة كبيرة.
وبالمناسبة، فشركة رياح السويس للطاقة هي مشروع خاص مملوك بشكل مشترك لشركة أكوا باور، واللي هي مطور ومستثمر دولي بيمتلك ويدير محفظة من محطات توليد الطاقة وتحلية المياه، وشركة HAU Energy فهي منصة أسهم الطاقة المتجددة التي تم إنشاؤها مؤخراً واللي بيستثمر فيها البنك الأوروبي لإعادة الإعمار والتنمية إلى جانب شركة حسن علام للخدمات العامة وشركة ميريديام أفريقيا للاستثمارات.
أما على الجانب المصري، فمصر دلوقتي بتسعى دلوقتي لتحقيق طموحها في الطاقة المتجددة والوصول بها إلى 42% بحلول سنة 2030، ومن خلال شراكتنا مع البنك الأوروبي لإعادة الإعمار والتنمية كشريك تنمية رئيسي ضمن محور الطاقة ببرنامج "نُوَفِّي"، فهيتم حشد التمويلات المختلطة اللي هتساهم في جذب استثمارات القطاع الخاص للطاقة المُتجددة في مصر.
ولحد دلوقتي، تم تدبير التمويلات لمشروعات بقدرة 4.7 جيجاوات، وبيتم العمل عليها عشان ننجز مستهدفات البرنامج لخفض استهلاك مصر من الوقود والتوسع في مشروعات الطاقة النظيفة.
بس قريب جدا هنلاقي مشروع مزرعة الرياح اشتغل، وحقق هدفه سواء من تحقيق استفادة مصر من الطاقة المتجددة أو من تحقيق دخل محترم من المحطة دي يقدر يسند الاقتصاد كويس جدا.
0 تعليق