تطبيق انستاباي بقي في الوقت الحالي واحد من اهم التطبيقات اللي موجودة علي تليفون كل مصري، خصوصا أنه سهل بطريقة كبيرة تحويل واستقبال الفلوس بين الناس وبعضهم البعض بكل سهولة ويسر.. ياتري الحد الاقصي للسحب والتحويل منه بتوصل لكام.. واية ابرز المزايا اللي عملها البنك المركزي علي التطبيق.
 

مع بداية سنة 2025، البنك المركزي جهز مفاجاة حلوة لكل المصريين، وأصدر مجموعة من القرارات بتتضمن مد إعفاء العملاء من كل المصروفات والعمولات الخاصة بخدمات التحويلات البنكية للأفراد واللي بتتم من خلال الإنترنت والموبايل البنكي بالجنيه المصري، وكمان مد الإعفاء من كل المصروفات والعمولات الخاصة بخدمات التحويلات لعملاء المنظومة الوطنية للمدفوعات اللحظية وتطبيق إنستا باي.

البنك المركزي قال أن القرار جاي في أطار خطة تحفيز المواطنين على استخدام الخدمات المالية الرقمية، والاستفادة بما تقدمه من مميزات لإنجاز الخدمات المالية بسرعة ومن أي مكان وفي أي وقت، وتحقيق رؤية الدولة للتحول لمجتمع أقل اعتمادًا على أوراق النقد وتعزيز الشمول المالي.

طيب تطبيق انستاباي ده ظهر امتي؟
تطبيق انستاباي واحد من التطبيقات اللي الدولة اطلقتها ضمن المنظومة الوطنية للمدفوعات اللحظية في شهر إبريل 2022، علشان تكون  بديل متكامل للمدفوعات النقدية وبتيح كل خدمات التحويلات للعملاء لحظيًا طوال أيام الأسبوع على مدار 24 ساعة.

تطبيق انستاباي من وقت ظهوره شكل انتشار كبير جدا وزيادة كبيرة في حجم المعاملات المنفذة من خلاله بأجمالي 1.5 مليار معاملة بقيمة وصلت لـ 2.9 تريليون جنيه في  2024، وحاليا وصل عدد مستخدمي التطبيق لما يقرب عن 12.5 مليون عميل.
طيب حدود السحب والتحويل من خلال تطبيق انستاباي بتوصل لكام؟.

البنك المركزي المصري حدد حدود السحب من تطبيق إنستا باي وده بعد تعديل الحد الأقصى للمعاملات اليومية والشهرية والحد الأقصى للمعاملة الواحدة على التطبيق الرقمي وفقا للقواعد المنظمة لخدمات تطبيق المدفوعات اللحظية إنستا باي والمنظومة الوطنية للمدفوعات اللحظية، وده بسبب تزايد أعداد وقيم المعاملات على المنظومة الوطنية للمدفوعات اللحظية، واللي تطلبت زيادة الحدود اليومية والشهرية للمعاملات على التطبيق لاستيعاب كل شرائح المستخدمين.

البنك المركزي حدد حدود السحب من خلال تطبيق إنستاباي وبيوصل الحد الأقصى للسحب للمعاملة الواحدة لـ70 ألف جنيه، والحد الأقصى للمعاملات في اليوم الواحد بيوصل لـ 120 ألف جنيه، والحد الإقصي للسحب الشهري بيوصل لـ 400 ألف جنيه .

طيب اية اخر التحديثات الأخيرة اللي عملها تطبيق انستاباي علي التطبيق؟.

البنك المركزي مؤخرًا عمل تحديث مهم علي تطبيق انستاباي للتحويلات المالية لضمان عدم حدوث تحويلات خاطئة وقت كتابة عنوان الدفع، وعن طريق التحديث العميل اللي هتحول له يقدر يشارك ويرسل رمز الاستجابة السريع QRcode أو رابط الدافع Payment Link للطرف اللي هيحول الفلوس.

البنك المركزي استهدف من التحديث الأخير تقليل احتمالات التحويل الغلط واللي ممكن يقع بسبب كتابة عنوان الدفع بشكل يدوي، والهدف من التحديثات هو القضا علي الأخطاء الشائعة في عمليات التحويل الأموال، وبيضمن إدخال بيانات صحيحة بنسبة 100%، وبيأكد اتمام عمليات التحويل بأعلى معايير الجودة والسهولة والأمان