يا ترى إيه اللي بيحصل في سوق الفضة، وليه أصبح المعدن البلاتيني بيجذب أنظار المستثمرين في الوقت ده من بداية سنة 2025، وهل هتقدر تحافظ على مكاسبها في الشهور الجاية على حساب الدهب، ولو انت مستثمر وبتدور على ملاذ آمن مع بداية 2025، تروح للفضة ولا تخليك في الدهب أو أي وعاء ادخاري تاني.

في الأيام الأخيرة، معدن الفضة انتعش بشكل كبير في الأسواق العالمية، وحقق مكاسب كبيرة جدا على حساب الدهب، وده ساهم في جذب أنظار المستثمرين له بشكل كبير.

ونقدر نقول إن الفضة على ميعاد مع تحقيق قفزة بنسبة 31% خلال سنة 2025، وده مش كلامنا ده كلام الخبرا، فهل فعليا الوقت الحالي هو مناسب للاستثمار في المعدن الثمين؟

بص يا سيدي، خبراء الفضة في العالم، أكدوا إن الأسعار حققت قفزة كبيرة بأكثر من 20% في سنة 2024، لكنها فقدت بعض من قوتها في آخر شهور السنة بسبب ارتفاع العوائد الأمريكية، وقوة الدولار، والمخاوف المتعلقة بنمو الاقتصاد العالمي خارج الولايات المتحدة.

ولكن رغم التحديات الحالية والرياح المعاكسة، إلا أن الخبراء توقعوا مستقبل مشرق للفضة، بمعنى أنها هتستمر في تسجيل سعر ما بين 36 و38 دولار للأونصة في 2025، وده مع التوقعات بأن انخفاض العوائد الأمريكية هيزيد من جاذبية الفضة، عشان تبقى ملاذ آمن للمستثمرين.

كمان، الخبراء بيقولوا إن السنة الجديدة 2025  هتشهد تحول باتجاه السلع الدورية، وده هيدعم الطلب على الفضة بشكل كبير، كمان ارتباط الفضة الوثيق بالدهب هيعزز من فرص ارتفاع قيمتها في الفترة الجاية.

ونقدر نقول إن التوترات الجيوسياسية هتزود الإقبال على الفضة كملاذ آمن، وده كان كلام أوليه هانسن، رئيس استراتيجية السلع في بنك ساكسو، واللي أكدت إن  التوترات الحالية في مختلف أنحاء العالم دفعت المستثمرين لزيادة إقبالهم على الفضة الدهب كأدوات للتحوط ضد المخاطر الاقتصادية.

ضيف على كل ده إن التحديات الاقتصادية، زي مثلا ارتفاع الديون في الولايات المتحدة، ساهمت في إن الفضة والمعادن الثمينة تبقى خيار آمن للمستثمرين، وده ساهم بشكل كبير في رفع أسعار الفضة.

ولو حضرتك عايز تحسب مكاسبك في الفصة لو هتستثمر فيها، فلازم تحدد نسبة الارتفاع في سعر الفضة من أخد الفارق بين السعر المتوقع (38 دولارً) والسعر الحالي (28.90 دولارً)، بعيدين تقسمه على السعر الحالي، بعد كده هتضرب النتيجة في 100 عشان تحصل على النسبة المئوية.

وبناء على الحسابات دي فمتوقع إن سعر الفضة يرتفع بنسبة 31.4% في السنة الجديدة عشان تكون حصان رابح في 2025 للمستثمرين ولأي حد بيستثمر فيها.