في الكام يوم اللي فاتوا رئيس الوزراء، الدكتور مصطفى مدبولي أعلن  إن مصر سددت إلتزامات خارجية بقيمة 39 مليار دولار خلال عام 2024 وقال إن السنة اللى فاتت كانت كان من أصعب الأعوام على الدولة نظرا للظروف الدولية والإقليمية وأكد أن ديون العام الجديد 2025 ستكون «أقل بكتير».. بس يا ترى الحكومة جابت ال 39 مليار دول منين ؟ وايه خطتها للتعامل مع ملف الديون الفترة الجاية ؟

في 2024 الحكومة المصرية أعلنت عن سداد 39 مليار دولار ديون.. وده رقم كبير جدا كان ليه تأثير كبير على الاقتصاد الوطني..  خصوصاً في ظل التحديات اللي عشناها كلنا خلال السنين الأخيرة.

السؤال المهم.. الفلوس دي جت منين؟

طبعاً مش سهل على دولة زي مصر إنها  تدفع المبلغ ده من ميزانيتها لوحدها وده اللي بدأ المسئولين في الحكومة يشتغلوا عليه .. ومصر كانت بتعمل على تحصيل أموال من خلال عدة مصادر منها  توسيع قاعدة الاستثمارات.. في السنين الأخيرة مصر اشتغلت على جذب استثمارات من الخارج سواء كان من خلال مشاريع بنية تحتية ضخمة زي العاصمة الإدارية الجديدة أو عن طريق جذب مستثمرين في مجالات مختلفة.

كمان  في خطوة مهمة الحكومة بدأت تبيع بعض الأصول الحكومية اللي مش هتضر الاقتصاد..  زي الشركات العامة والأراضي.. والفلوس دي ساعدت بشكل كبير في سداد جزء من الديون.

كمان الحكومة المصرية كانت بتتفاوض مع المؤسسات المالية العالمية زي البنك الدولي وصندوق النقد الدولي علشان تحصل على قروض بفوائد أقل وأطول في مدة السداد.

طب هل الحكومة عندها خطة لتقليل حجم الديون؟

فيه بالفعل خطة معتمدة على عدة محاور أساسية أبرزها تحقيق نمو اقتصادي مستدام.. الحكومة بتعمل على تحفيز الاقتصاد المصري من خلال مشروعات كبيرة في مجالات مختلفة زي الطاقة المتجددة والسياحة والصناعة علشان ترفع مستوى الإنتاجية وتزيد الإيرادات.

كمان توسيع مصادر الدخل.. زي ما قلنا الحكومة بتحاول توسيع قاعدة الإيرادات عن طريق زيادة الصادرات وجذب استثمارات أجنبية وكمان العمل على تطوير السياحة والقطاع العقاري.

الحكومة كمان بتحاول تقلل من الإنفاق الحكومي غير الضروري وبتعزز من كفاءة الإدارة المالية بحيث يكون فيه توازن بين الإيرادات والنفقات.

لكن على الرغم من دي الخطوات يبقى السؤال المحوري مصر عليها كام ديون أصلاً؟

في تقرير حديث من وزارة المالية، مصر عليها ديون تتراوح بين 160 إلى 170 مليار دولار.. وده رقم كبير وبيعني إن مصر بتدفع سنوياً فوايد ضخمة على ديونها لكن الحكومة مش سايبة الأمور على حالها.

الديون مش دايماً حاجة سلبية لو تم استخدامها في مشروعات تصب في المصلحة العامة وتساهم في نمو الاقتصاد على المدى الطويل.. وعلى العكس لو الديون كانت بتستخدم في تمويل مشروعات غير مجدية أو لو كانت بتضغط على الاقتصاد بشكل غير محسوب ده ممكن يؤدي لمشاكل في المستقبل.

طب إزاي الحكومة بتدير ديونها؟

وزارة المالية المصرية بتعمل على تنفيذ استراتيجية لإدارة الديون بشكل يخفف من العبء المالي على المدى الطويل.. والدولة بتحاول تقليل الفجوة بين حجم الديون والإيرادات من خلال تحسين الإيرادات وتخفيض الفوايد وده بيحسن الوضع بشكل تدريجي.. لكن طبعا كل ده محتاج وقت طويل.

خلاصة الكلام ..  رغم كل التحديات مصر قادرة على إدارة ديونها بشكل أفضل والـ 39 مليار دولار ديون اللي تم سدادها في 2024 خطوة مهمة على الطريق..ومع الخطط الاقتصادية اللي بتنفذها الدولة مصر بتسعى لتقليل حجم الديون في المستقبل علشان نعيش في بيئة اقتصادية أكثر استقراراً.