يا ترى إزاي البنوك المصرية جمعت 6.4 مليار دولار مدخرات أجنبية في 9 شهور؟و هل ده مؤشر إيجابي ولا لأ؟ وإيه علاقة الموضوع بشهادات الادخار الدولارية؟ وهل العملاء بيتجهوا للادخار بالدولار بدل الجنيه؟ وإزاي ده ممكن يأثر على الاقتصاد المصري؟ خلينا نفهم القصة مع بعض لأن الموضوع ده مش خبر عادي.

من مارس 2024 ومن بعد تحرير سعر صرف الجنيه المصري.. البنوك المصرية قدرت تحقق طفرة كبيرة جدًا في المدخرات الأجنبية.. خلال 9 شهور بس ودائع العملات الأجنبية زادت بـ6.4 مليار دولار ووصلت لـ57.1 مليار دولار بنهاية نوفمبر اللي فات بدل ما كانت 50.7 مليار دولار في مارس.

بس إيه اللي خلى الإقبال على الادخار بالدولار يزيد بالشكل ده؟

في نوفمبر لوحده، البنوك استقبلت مدخرات أجنبية بقيمة 500 مليون دولار أما في سبتمبر حصلت على أعلى زيادة شهرية من بداية السنة، بحوالي 1.38 مليار دولار.. وده بيعكس توجه واضح جدًا من الأفراد والشركات نحو الادخار بالدولار.

مش بس كده .. الودائع طويلة الأجل وشهادات الادخار بالدولار زادت بقيمة 70 مليون دولار خلال نوفمبر.. ووصلت لـ43.4 مليار دولار. في المقابل، الودائع تحت الطلب بالعملات الأجنبية انخفضت لـ13.5 مليار دولار بدل 14 مليار دولار الشهر اللي قبله يعني الناس بتحول فلوسها من ودائع قصيرة الأجل لودائع طويلة الأجل أو شهادات.

طيب، إيه علاقة الفايدة بالموضوع؟

في أكتوبر 2024 البنك الأهلي المصري وبنك مصر خفضوا الفايدة على شهادات الادخار الدولارية لـ8.5% على الشهادات الثلاثية اللي العائد فيها بالجنيه و6.5% على الشهادات اللي العائد فيها بالدولار..وده حصل بعد ما الفيدرالي خفَّض الفايدة 3 مرات متتالية ووصلت بين 4.25% و4.5%.

لكن وعلى عكس التوقعات الإقبال على الادخار بالدولار مقلش. ليه؟ لأن الفايدة دي لسه مغرية اوى خصوصًا مع استمرار توقعات خفض الفايدة على الجنيه.

كمان في عامل تاني مهم جدًا... زي تحويلات المصريين في الخارج.. التحويلات دي وصلت لـ23.7 مليار دولار خلال أول 10 شهور من 2024، بزيادة 45.3% عن السنة اللي قبلها.. وفي أكتوبر بس التحويلات قفزت بنسبة 68.4% وسجلت 2.9 مليار دولار.

وخد بالك تحويلات العاملين بالخارج تعتبر أكبر مصدر للنقد الأجنبي في مصر وده واضح جدًا في الأرقام.

طب هل ده معناه إن الاقتصاد المصري بيتحسن؟

في الحقيقة، الأرقام دي إيجابية جدًا لأنها بتوضح إن العملاء بيثقوا في القطاع المصرفي المصري.. كمان زيادة المدخرات الأجنبية بتمثل مصدر مهم لدعم الاحتياطي النقدي ومواجهة الضغوط الاقتصادية.

لكن خلينا نقول كمان إن ده مؤشر إن الناس بتميل أكتر للدولار كوسيلة للحفاظ على قيمة مدخراتهم خصوصًا مع تقلبات سعر الجنيه.