لو بتشوف برنامج شارك تانك واللي بقي واحد من أشهر البرامج اللي بتجمع بين رجال الأعمال والمستثمرين لمناقشة الأفكار المبتكرة في عالم الأعمال لكن كتير من الشباب والمواطنين مش بيفهوا مصطلحات كتير بتتقال في البرنامج لأنها بتتقال بالانجليزي وعشان كده إحنا هنشرحلكم النهاردة إيه أشهر المصطلحات دي ومعناها.. خليكم معانا للأخر عشان نفهم مع بعض.

أول مصطلح معانا هو إدارة المخاطر أو (Risk Management) ودي معناها العملية اللي بتحدد فيها  الشركات وتصنف المخاطر المحتملة اللي ممكن تهدد أهدافها أو استراتيجياتها، يعني هي وحدة بمثابة الإنذار المبكر لأصحاب الشركات واللي بتحذرهم من تحديات أو مخاطر ممكن تواجهم في المستقبل القريب ودا بيساعد في حماية الشركات من الانهيار أو الخسارة.

تاني مصطلح انت بتسمعه في الشارك تانك هو القيمة (Valuation) أو القيمة التقديرية والمقصود بيها عملية تحديد القيمة المالية لشركة أو أصل، بناء على تحليل الأداء المالي الحالي وتوقعات الإيرادات المستقبلية، والسياسة دي بتسمح للمستثمربن بمعرفة القيمة التقديرية لتحديد قرارهم بالشراء أو بيع الأصول أو الأسهم أو ببساطة هي إدارة خاصة بتسعير الأصول اللي في الشركة وتحديد أنسب وقت للبيع والشراء وموضوع تقدير القيمة لأي مشروع مهمة جدا في بداية أي مشروع لانه بيحدد لك التكلفة المطلوبة.

ومن بين المصطلحات اللي بتسمعها في  شارك تانك  (Working Capital) والمقصود بيه رأس المال العامل ودا مصطلح بيحدد الفرق بين الأصول المتداولة زي النقد والمستحقات، والالتزامات المتداولة زي الديون قصيرة الأجل ومؤشر رأس المال العامل قدرة الشركة على تمويل عملياتها اليومية دون الحاجة إلى تمويل خارجي.

وعشان نقربلك المسافة على سبيل المثال لو صاحب مشروع وعندك رأس مال عامل كبير دا معناه إنه عندك القدرة على دفع النفقات اليومية للمشروع زي أجور الموظفين وفواتير الموردين وتكاليف الإنتاج، حتى في الأوقات اللي بتواجه فيها صعوبات مالية، فرأس المال العامل هو المال اللي هتحتاجه يوميًا لضمان استمرارية عملك ونقدر نقول عليه السيولة الزايدة في الشركة أو المشروع.

فيه مصطلح تاني المشاركين في شارك تانك بيستخدموه دايما وهو (Cash Flow) أو التدفق النقدي  ودا معناه حركة الفلوس أو السيولة داخل وخارج الشركة أو المشروع على مدار فترة معينة والمؤشر دا بيعكس قدرة الشركة على توليد الأموال اللازمة لتغطية نفقاتها وبالتالي تجنب المشاكل المالية.

وحسب خبراء الشركات لو كان تدفقك النقدي إيجابي فدا معناه إن شركتك بتحقق أرباح وقادرة على تغطية نفقاتها التشغيلية بسهولة والعكس صحيح لو كان التدفق النقدي بالسالب فدا معناه صعوبة في تسديد الالتزامات.

أخر مصطلح معانا  وبيتداول بكثرة في شارك تانك هو  (Assets & Liabilities) أو الخصوم والأصول ودا بيطلق للدلالة على الموارد اللي بتملكها الشركة أو المشروع وبتساهم في تحقيق القيمة المالية زي الممتلكات والمعدات والأجهزة والمقصود بالخصوم هنا  الديون أو الالتزامات المالية اللي لازم الشركة تدفعها للآخرين في المستقبل وعشان شركتك تكون ناجحة يبقي لازم تكون الأصول أكتر من الخصوم، لأن دا معناه ببساطة إن ممتلكات الشركة أكبر من ديونها.