من وقت للتاني جمرك سيارات مطار القاهرة الدولي بيعرض من يوم للتاني عن عربيات جديدة للبيع في مزاد علني.. ياتري النوع ده من المزادات بيمشي أزاي واية شروط واية ظروف العربيات اللي بتكون موجودة فيه.. لو عايز تعرف كل ده شوف الفيديو ده للاخر

من فترة للتانية اكيد سمعت أو قراءت خبر عن انعقاد مزاد علني لبيع عربيات بجمرك سيارات مطار القاهرة الدولي، وايد بيكون عندك فضول تعرف الموضوع ده بيتم ازاي وظروف العربيات اللي بتكون معروضة فيه بتكون شكلها عاملة اية وماركتها اية، وهل هيا عربيات جديدة ولا هلكانة، واجراءات تراخيصها بتكون منين، وهل النوع ده من العربيات بيكون ورقه زي العربيات الموجودة في السوق المصري. 

الاسئلة دي جاوب عليها جمرك سيارات مطار القاهرة الدولي واللي أعلن عن شروط الدخول في مزادات العربيات اللي بتعرض من وقت للتاني، وقال أن العربيات المعروضة في المزادات بتكون واردة من الخارج وهيا من تنازلات ومصادرات مصلحة الجمارك وبتكون ماركات وموديلات وطرازات وأنواع متنوعة ومختلفة.

جمرك السيارات حدد كمان اجراءات الدخول للمزادات وقال أنها بتم عن طريق شراء كراسة الشروط الخاصة بالمزاد واللي بيوصل سعرها 400 جنيه، وبكده بيكون المواطن اشترك في المزاد ومن حقه معاينة العربيات المعروضة في المزاد، وده بتكون مركونة في ساحات جمارك السيارات بمطار القاهرة الدولي، وبتكون المعاينة من الساعة 9 الصبح لحد الساعة 2 الظهر قبل انعقاد المزاد.

جمرك سيارات مطار القاهرة اشترط علي الناس اللي عايزة تدخل المزاد بضرورة تقديم بطاقة الرقم القومى للأفراد العاديين، ولازم تكون سارية، وتقديم البطاقة الضريبية شرط دخول المزاد للتجار ويحق للمشترك في المزاد وقت المعاينة أنه يجيب اي حد من الناس اللي عندها خبرة في معاينة العربيات.

الجمرك اشترط كمان علي الناس اللي عايزة تدخل المزاد بعد شراء كراسة الشروط، سداد مبلغ تأمين دخول المزاد واللي بيوصل لـ 10 آلاف جنيه بخزينة جمرك سيارات بمطار القاهرة كتأمين مؤقت بخزينة الجمارك والتأمين ده مش ممكن يترد الا بعد انتهاء جلسة المزاد، وفي حالة لو العربية الي المواطن عايزها مرستش عليه في المزاد يقدر يسترد قيمة التأمين كاملة، وفي حالة ان العربية اللي عايزها ترسي عليه ففي الحالة دي بيتم خصم قيمة التامين من ثمن العربية.

الجمرك اشترط كمان أنه في حالة لو المواطن عايز يدخل المزاد علي اكثر من عربية لأزم يدفع تامين لكل عربية قبل المزاد، والمواطن اللي بيرسي عليه المزاد لازم يسدد 30 % مـن ثمـن العربية بمجرد ما المزاد يرسي عليه، وفـي حالة أنه ميددش ف نفس اليوم في الحالة دي التأمين اللي دفه من حق الجهة الإدارية.

بعد ما المواطن اللي رسي عليه المزاد يسدد 30% من قيمة العربية في نفس يوم المزاد، بعدها هيسدد باقي ثمن العربية خلال 15 يوم من اليوم التاني للمزاد في واحد من البنوك الوطنية سواء البنك الأهلي أو بنك مصر أو بنك القاهرة.