ليه مصر قررت تزود حصتها في صندوق النقد الدولي بنسبة 50%؟  القرار ده معناه إيه؟ وهل كده مصر هتاخد تمويلات أكبر ولا مجرد خطوة لتعزيز موقفها الدولي؟ وإيه الفايدة اللي هتعود علينا من كده؟

مؤخرا الجريدة الرسمية نشرت قرار الرئيس عبد الفتاح السيسي بزيادة حصة مصر في صندوق النقد الدولي بنسبة 50%.. ومن بعد النشر  ناس كتير بدأت تسأل: ليه مصر عملت كده ؟ وهل القرار ده هيأثر على الاقتصاد المصري؟

فى الأول كده خلينا نقولك .. يعني إيه حصة في صندوق النقد؟
بص يا سيدي.. حصة أي دولة في صندوق النقد الدولي معناها التزامها المالي تجاه الصندوق.. ودي بتتحدد بناءً على شوية عوامل زي حجم الناتج المحلي الإجمالي وحجم التجارة الخارجية بتاعها.

وزيادة الحصة ببساطة بتعني إن مصر هتسهم بمبلغ أكبر في رأسمال الصندوق..  وده بيحقق حاجتين مهمين جدً.. واجد.. زيادة النفوذ يعني صوت مصر هيبقى أقوى جوه الصندوق وبالتالي قدرتها على التأثير في القرارات الدولية هتزيد.. اتنين .. إمكانية تمويل أكبر لأن كل ما حصتك في الصندوق تزيد كل ما قدرتك على الاقتراض من الصندوق هتبقى أكبر لو احتجت.

الزيادة الجديدة دي معناها إن مصر هتلتزم بدفع حوالي 1.365 مليار دولار.. لكن متقلقش مش كل ده هيبقى بالدولار.. 25% من المبلغ هيتدفع بالدولار أو عملات أجنبية تانية.. 75% هيتدفع بالجنيه المصري وده بيقلل الضغط على احتياطي النقد الأجنبي.

طب إيه الفايدة اللي هتعود علينا؟

فيه فايد كتير زي تعزيز الدور الدولي لأن لما حصة مصر تزيد مشاركتها في اتخاذ القرار جوه الصندوق هتبقى أكبر وده بيضمن إن مصالح مصر والدول النامية تبقى موجودة على الطاولة.. كمان تمويل أكبر لو احتجنا لأن القرار ده مش معناه إننا بناخد قروض دلوقتي لكن لو حصلت أي أزمة مستقبليا هيبقى عندنا قدرة على الحصول على تمويلات أكبر,, بالاضافة كمان لتعزيز الثقة الدولية.. خطوة زي دي بتعكس للعالم إن مصر ملتزمة بدورها في الاقتصاد العالمي.. وده ممكن يحسن التصنيف الائتماني بتاعنا ويشجع الاستثمارات الأجنبية تدخل السوق المصري.

ومن ناحية العلاقات.. القرار ده هيقوي التعاون بين مصر وصندوق النقد.. والتعاون ده مش بس في التمويلات لكن كمان في الدعم الفني وبرامج الإصلاح الاقتصادي اللي مصر شغالة عليها.. وطبعًا لما الصندوق يشوف إننا بنلتزم وبنزود حصتنا ده هيزود الثقة فينا كمشارك أساسي في النظام الاقتصادي العالمي.

لكن خليني أقولك حاجة.. الزيادة دي مش معناها إن الموضوع كله وردي.. في النهاية مصر لازم تستمر في تنفيذ برامج الإصلاح الاقتصادي علشان ما يحصلش ضغط إضافي على الموازنة العامة.. لكن المؤكد ان زيادة حصة مصر في صندوق النقد الدولي خطوة استراتيجية مهمة.