أكد الإعلامي مصطفى بكري أن الدولة تعلن أن هناك أخطاء في إدارة بعض الملفات الداخلية، مشيرا إلى أنها سوف تعمل على تصحيحها.
وقال بكري خلال برنامج "حقائق وأسرار" المذاع على قناة "صدى البلد": "الدولة عارفة أن في أخطاء في الداخل وفي إدارة بعض الملفات المهمة وذات الطابع الاقتصادي أو الاجتماعي، ولكن مش معني كده أن خلاص وقعت مصر واقفه على رجليها وبتصلح أي أخطاء والرئيس بيرشد الأمور".
وأضاف: "شفتوا لما الرئيس يطلب من رئيس الوزراء يجيب رجال الأعمال ويقولوا وجهات نظرهم دا دليل أن عهد أننا نخبي الحاجة معادش ينفع، لازم يبقى في مكاشفة وفي صراحة للوضع أنا عشان أستوعب الناس وأحتويها لازم أبقى صريح ولازم الناس تصدقني في السراء والضراء لازم أبقى واضح أنا عندي مشاكل 1-2-3 ولكن في نفس الوقت هل أنا بتواطأ هل أنا مش عايز أعمل؟ لا".
وتابع: "في ناس كسلانة وناس مبتعملش بالتوجيهات وفي انحرافات ومشاكل وناس بترفع الأسعار زي ما هي عايزة بمزاجها، وأنا متصور وعندي ما يشبه الحس السياسي أن الرئيس في حاجات كتير مش هيسكت عليها بداية من الشهر الجاي وهتتاخد إجراءات وممكن يبقى في تغييرات لأي حد مش نافع أو لأي حد أدى دوره أو لأي حد مش بنفس القوة".
وواصل: "البلد يا جماعة بلدنا ولازم يبقى في سياسة المصارحة والمكاشفة ولازم نبلغ قائد هذا البلد كل كبيرة وصغيرة، ولا يجب الصمت لأنه في النهاية أي حاجة هتحصل الكل هيدفع التمن ومسؤولية الرئيس من أول يوم قال أنتم شركاء معي، وأنتم طرف أساسي في إدارة هذا الوطن".
وأوضح: "المصارحة يجب أن يكون عليها الإعلام والصحافة والمجالس النيابية وكل ده مهم جدا لدفع الدولة إلى الأمام أنها تاخد خطوات للأمام ومش معنى ده أني أهد أي إنجاز وأقعد أشكك في أي حاجة محدش عايز التريند على حساب الوطن حتى لو الناس كلها واجهتك لكن خليك مع الحس الوطني مع الدولة الوطنية ودا اللي أكد عليه الرئيس النهاردة قضية الوعي أكد عليها للمرة الألف يا جماعة خليكم عندكم وعي للحفاظ على الأوطان ومواجهة الشائعات والأكاذيب".
واختتم: "اوعى نفرح بالفرقعة اللي بيعملها فلان وعلان لا الناس بكرة بتشرب كأس المرار جراء اللي حصل وشربناه بعد 25 يناير وشوفنا الرعب والبهدلة والذعر فما بالك إذا جاءت حاجة تانية لا قدر الله".
0 تعليق