يا ترى إيه هو الجنيه الدهب البلدي، واللي غزا أسواق الدهب خلال الفترة الأخيرة، إيه هو شكله، وإيه وجه الاختلاف بينه وبين المغلف أو المصنع والمدموغ، وهل بيتم الاعتراف بيه في المعاملات بين تجار الدهب وفي سوق الصاغة.
 

في الفترة الأخيرة، الجنيه الدهب بقى يجذب اهتمام المستثمرين والراغبين في شراء المعدن النفيس، عشان بيحفظ قيمة المدخرات كويس جدا، وكمان مصنعيته قليلة بالمقارنة بالمشغولات، وممكن حضرتك تسترجع جزء من المصنعية لما تيجي تبيعه، وده اللي بيطلق عليه (الكاش باك).

الكلام ده طبعا مش بينطبق على  الجنيه الدهب البلدي، لأنه بيعتبر خطر كبير ومش مضمون، خاصة إنه بينم تصنيعه في ورش صغيرة غير مرخصة، وغالبًا بيصعب ضبط عياره أو وزنه، لأن من المفترض أن الجنيه الدهب يتصنع من عيار 21 وبوزن 8 جرام، لكن مع الجنيه البلدي في صعوبة في ضبط عياره خلال تصنيعه.

والجنيه الدهب البلدي غير مدموغ بدمغة مصلحة الدمغة والموازين، بالإضافة لأن صعب بيعه، وفي حالة لو نجحت في بيعه بتفقد ميزة استرداد المصنعية أو الكاش باك.

وخبراء الدهب بينصحوا بشراء الجنيه المنتج من الشركات والمصانع المعروفة والمرخصة، لأنه مضمون ومغلف ومدموغ، وكمان بييقي إنتاج شركات، ولما تيجي تبيعه بتسترد جزء من قيمة المصنعية، وكل ده بجانب إن عياره ووزنه مظبوطين بالملي .

وبالنسبة لأنواع الجنيه الدهب، فهي نوعين، أولهم الجنيه المحلي المغلف، وبيزن 8 جرام من عيار 21، وبيتم دمغه بمصلحة دمغ المصوغات والموازين التابعة لوزارة التموين، وبيعتبر الأفضل عند شراء الجنيهات الذهبية ده في حالو إنك لو ناوي على استثمار، كمان هو مضمون وبيتباع بسهولة.

أما بقى الجنيه الدهب القديم، كان بيتم صنعه في بريطانيا والدول التابعة لها في سنة 1911، وبيشمل جنيهات باسم (جورج، فكتوريا، وإدوارد) ، وكلها عيار 21 ووزن 8 جرام، وبيعتبر الجنيه ( چورچ) أفضلهم.

أما عن فكرة التصنيع، فبيتم تصنيعه من عيار 21 قيراط، وبوزن 8 جرام زي ما قولنا، وبيتوافر منه فئات بأوزان تانية ، زي (النص جنيه) اللي بيصنع بوزن 4 جرام، و(الربع جنيه) اللي بوزن 2 جرام.

وانهاردة سجل سعر الجنيه الدهب في مصر، 30280 جنيه مصري، واستقر سعره بسبب استقرار أسعار المعدن الأصفر في السوق المحلي، ووصل سعر عيار21 المصنوع منه الجنيه الدهب بمختلف فئاته ل 3785 جنيه.

أما مصنعية الجنيه الدهب فهي الأرخص مقارنة بالمشغولات، وبتوصل ل 50 جنيه تقريباً عن كل جرام، بإجمالي 400 جنيه للجنيه الواحد، وممكن تسترد منها حوالي 20 جنيه ( كاش باك) لو بعته للصايغ اللي اشتريته منه، بشرط ترجعه بالغلاف وبنفس الحالة اللي اشتريته عليها، يعني يكون جنيه لانج.