متابعينا الكرام في كل مكان أهلا وسهلا بكم ولايف جديد لأهم التقارير اللي قدمتها وحدة أبحاث بانكير على مدار الساعة النهاردة الاثنين 13 يناير 2024.

وحدة بانكير قدمت تقارير مهمة النهاردة في الشأن الاقتصادي والمالي في مصر  وسلطت الضوء على أهم الأحداث اللي ليها علاقة بالاقتصاد.

البداية مع الحدث الأهم وهو توجيهات الرئيس السيسي النهاردة بخصوص التعليم وربطها بأسواق العمل.

وقال التقرير إن الرئيس عبد الفتاح السيسي اجتمع النهاردة مع الدكتور مصطفى مدبولي رئيس  الحكومة والدكتور أيمن عاشور وزير التعليم العالي والبحث العلمي ومحمد عبد اللطيف وزير التربية والتعليم والتعليم الفني ودا من الاجتماعات المهمة جدا لأنها حددت مسار مستقبل التعليم في مصر خلال السنين الجاية.

ولفت التقرير  إن كل الدول اللي نهضت وحققت الرخاء والتقدم والرفاهية كان التعليم هو كلمة السر فيها وعشان كده دول العالم المتقدم بتعتير التعليم افضل استثمار في حياة الدول والحكومات لأنه تعليم بيخلق كوادر جديدة قادرة إنها تقود الاقتصاديات وفي نفس الوقت تقدر تعمل نهضة عملية في كل القطاعات.

وأشار بانكير إن الدول المتقدمة ربطت بين التعليم وبين احتياجات وتوجهات سوق العمل وعشان كده نجحت في احتكار التكنولوجيا المتقدمة.

وقال التقرير إن الرئيس السيسي وجه من تاني بربط التعليم بسوق العمل الحديث وخاصة في تخصصات البرمجة والتكنولوجيا الرقمية والهندسة والذكاء الاصطناعي لأن دي أسواق المستقبل ومصر لازم تحجز فيها مكان.

وشرح التقرير إن مصر مبدأتش من الصفر لأن فيها كليات بتطلع مبرمجين وعندها نوابغ فعلا لكن الرئيس يقصد هنا التعليم بشكل عام في مصر لازم يروح ناحية سوق العمل الحديث عشان الانطلاقة الاقتصادية من ناحية وتوفير فرص عمل مجزية  للشباب المصري مطلوبة في العالم كله.

كمان الرئيس بيخطط لأن مصر تكون مركز في علوم البرمجة ووحش تكنولوجي في المجالات العلمية الحديثة ومصر عندها عباقرة في كل التخصصات دي وفي كتير منهم في شركات عالمية.

منصات بانكير قدمت تقرير مهم النهاردة بخصوص ملف مهم جدا في حياة المصريين وهو ملف القمح واللي بيعتبر الغذاء الرئيسي للمصريين وتأمينه استراتيجيا من أولويات الدولةد

وقال التقرير إنه في 2024 واردات مصر من القمح قفزت لـ14.2 مليون طن مقارنة بـ10.8 مليون طن في 2023، يعني زيادة بنسبة 31%! وده أعلى رقم استيراد شوفناه من 2014.

وشرح التقرير أسباب زيادة واردات القمح وقال إن  فيه سببين اولهم توفر الدولار.. لأن الحكومة قدرت توفر عملة صعبة بشكل أكبر في 2024 مقارنة بالسنين اللي فاتت وده اللي ساعد في زيادة الاستيراد.

وتاني حاجة انخفاض أسعار القمح العالمية..  متوسط سعر القمح السنة دي كان حوالي 240 دولار للطن أقل بكتير من 2023 اللي كان فيها السعر معدي 350 دولار للطن يعني مصر اشترت كميات أكبر بتكلفة أقل نسبيا.

وقال التقرير إن مصر من أكتر الدول استهلاكاً للقمح في العالم بأكتر من 20 مليون طن في السنة و ده بيخلينا نعتمد على الاستيراد بشكل كبير لتغطية احتياجات السوق المحلي.. وروسيا لوحدها وفرت لمصر حوالي 74% من احتياجات القمح السنة دي..يعني تقريبًا 10.5 مليون طن.

وكشف بانكير إن الحكومة بتحاول تقلل الاعتماد على الاستيراد عن طريق زيادة الإنتاج المحلي وإن الموسم الحالي الحكومة مستهدفة زراعة 3.1 مليون فدان قمح.

التقرير الأخير في لايف النهاردة كان مختلف شوية وبيتكلن عن كواليس جديدة عن سبب زيادة حصة مصر في صندوق النقد الدولي.

وقال التقرير إن قرار مصر بالموافقة على زيادة حصتها في صندوق النقد الدولي بنحو 50% جه استجابة لقرارات المراجعة العامة الـ16 واللي أقرت زيادات حصص الدول الأعضاء، وحصة مصر في الصندوق بتوصل لـ2.037 مليار وحدة حقوق سحب خاصة.

ولفت بانكير إن القرار ده هيكون له نتيجتين الأولي منهم أنها هتخفض الرسوم الإضافية اللي بتدفعها مصر نتيجة ارتفاع التمويلات كنسبة في حصتها في الصندوق عن الحدود الطبيعية، خصوصا ان مصر في 2024، دفعت 184.5 مليون دولار رسوم إضافية على مستوى المديونية اللي موجودة علي مصر للصندوق.

تاني نتيجة هتستفاد منها مصر من زيادة حصتها في صندوق النقد لـ50% هيا أنها هتكون قادرة على اقتراض جديد من صندوق صندوق النقد الدولي في حالة حدوث أي صدمات.

وأكد التقرير إن مصر هتحصل علي شريحة بقيمة 1.2 مليار دولار ودي الشريحة الرابعة خلال أيام من قرض الـ8 مليار واللي مصر نجحت في الحصول علي موافقته في 2024.