مصر فيها شباب كتير نجحت وكبرت وقدرت تبني نفسها وتكون من اغنى الشباب مش في مصر بس لا في الوطن العربي كله وقدروا يغيروا مفاهيم كتير ويدخلوا اختراعات جديدة على الناس... خلونا نشوف مع بعض حكاية اغنى شباب في مصر.
إسلام سعد
اول واحد معانا هو مصمم الازياء اسلام سعد وهو شاب اتولد في اسرة بسيطة من بني سويف وقرر يعتمد على نفسة عشان يعرف يعيش وحاول يشتغل اكتر من شغلانة لحد مكتشف ان عنده موهبة في الازياء وانه بيفهم كويس في الموضة.
وبدأ مشوارة وهو عنده 18 سنة من اول مبلغ حوشه لما فتح محل صغير وواحدة واحدة لحد ماكبر وبقا من اشهر الناس في مصر والوطن العربي في مجال الازياء لدرجة ان محمد صلاح بقا بيلبس من عنده، ودا غير انه صمم ازياء لمشاهير العالم العربي زي هيفاء وهبي واحلام ونانسي عجرم.. ولحد دلوقتي هو بيكبر وبينجح وبقا من اغنى الشباب في مصر.
هاني سعد
تاني واحد وهو المهندس هاني سعد زوج درة.. وهاني يبقا مهندس معماري ورجل أعمال مصري درس في جامعة مصر الدولية في 2003 و أسس شركته الخاصة "Hany Saad Innovations" المتخصصة في البناء والتصميم والديكور و الشركة بتنفذ مشاريع ضخمة في أفريقيا والشرق الأوسط واشتغلت على أكتر من 800 مشروع بقيمة عدت الـ 97 مليون دولار.
هاني سعد مهتم بالتصوير وبيحب يمتلك سيارات فاخرة و بيحب السفر وبدأ مشواره واعتمد على نفسه لحد موصل وقدر يعمل اسم كبير وثروة كبيرة.
أحمد طارق خليل
رقم 3 معانا هو أحمد طارق خليل اللي اتعرف مؤخرا للناس كلها في برنامج شارك تانك.. وأحمد خليل هو رجل أعمال مصري معروف في مجالات كتير اتولد سنة 1977 في القاهرة واتخرج من كلية الهندسة البحرية في جامعة القاهرة سنة 1999.
بعد ما اتخرج بدأ شغله في مجال النقل البحري وفي سنة 2000 أسس شركته "أليانز الشرق الأوسط لإدارة السفن" الشركة دي بتقدم خدمات بحرية لوجستية لقطاع الصناعة البترولية زي النقل البحري إدارة السفن والخدمات اللوجستية وبفضل شغله الجاد الشركة بقت من أكبر الشركات في المنطقة في المجال ده.
لكن أحمد مش بس مستثمر في المجال البحري ده كمان دخل مجالات تانية زي التعليم التكنولوجيا والمشروعات الناشئة في 2023 أعلن عن استثمار 100 مليون دولار لإنشاء شركة رعاية صحية في مصر بالشراكة مع رجل الأعمال محمد فاروق.
كمان أحمد كان شريك في برنامج "شارك تانك" المصري اللي بيهدف لدعم المشاريع الناشئة وهو واحد من الأشخاص اللي ساهموا في تطوير ونجاح العديد من المشاريع في مصر.
أحمد الباز
رابع واحد وهو أحمد الباز صاحب اشهر سلسلة مطاعم في مصر وهي قصر الكبابجي .. وبدأ مشواره في التجارة وهو صغير وكان بيع الحلويات لزمايله في المدرسة أول خطوة له بعد كده جرب يشتغل في تجارة السيارات وأخذ توكيل لبيع التوك توك في طنطا لما وصل لسن التصرف في ميراثه من والده و قرر يفتح مطعم وكان اسمه "السرايا" بس فشلو بعدين غير اسمه لـ"الكبابجي" وعمل بعض التعديلات في المكان لكن بداية النجاح كانت لما قرر يتصدق بـ100 جنيه كانوا عنده فربنا رزقه من وسع..
و مع الوقت بدأ اسم "الكبابجي" ينتشر في الغربية وفتح فروع جديدة في طنطا وبعدها في القاهرة في يوم حصل حريق ضخم دمر فروعه في كفر الزيات فركز في توسيع شبكة مطاعمه وفتح فروع جديدة في الساحل الشمالي الشيخ زايد ويستعد لفتح فروع في السعودية والإمارات.
مؤمن عادل
اما اخر واحد معانا هو الدكتور مؤمن عادل صاحب سلسلة محلات بلبن الشهيرة .. والحكاية بدأت لما الدكتور مؤمن كان نفسه يدرس الطب البشري لكن مجموعه ما كانش كفاية فقرر يدرس طب بيطري بعد ما تخرج اشتغل كطبيب بيطري لكن ملاقاش نفسه في المجال ده.
وفي 2017 قرر مؤمن يغير مسار حياته ويفتح محل صغير متر في متر في اسكندرية اسمه بلبن، والمحل الصغير ده كبر وبقا اشهر محل في اسكندرية عشان يتوسع اكتر واكتر ويروح القاهرة.
ومؤمن دماغة كلها تجارة واعمال وبيفكر ازاي يستثمر ويعمل اختراعات جديدة وده سبب نجاحة ويبقا من اغنى الشباب في مصر بعد سلسلة نجاحات هو وفريقة ووصل عدد فروعة لـ 120 فرع في كل الوطن العربي وناس كتير متعرفش ان الدكتور مؤمن هو صاحب فكرة بلبن بس ده لانه مبيحبش الشهرة ولا بيحب يظهر في الاعلام كتير وكل همه يكبر بلبن وبس.
0 تعليق