يا ترى إيه هي أهداف الحكومة من قرار تحويل السيارات للغاز بدل من بنزين أو سولار ، هل الموضوع مرتبط بمكاسب اقتصادية عشان هنوفر مصادر الطاقة، ولا هو تقليل التلوث، طب احنا في مصر عندنا كام عربية اتحولت لغاز، واللي جاي شكله إيه.

في الفترة الأخيرة، الحكومة المصرية قررت تحويل السيارت أو العربيات عشان تشتغل بالغاز بدل البنزين والسولار، وبالفعل تم تحويل أعداد كبيرة لكده في الفترة الأخيرة.

طب إيه هي أهداف الحكومة من المبادرة دي؟

بص يا سيدي، الدولة دلوقتي عندها القدرة لتحويل السيارات للغاز الطبيعى، لأن بيوصل إنتاج مصر من الغاز الطبيعى 6.3 مليار قدم مكعب غاز يوميا، والجزء الأكبر من الاستهلاك بيروح لمحطات الكهرباء بحوالى 3.1 مليار مكعب.. كمان خطوة زي دي هتقلل فاتورة استيراد الغاز وخيرا كتير بيقولوا ان التكلفة بتاعت استيراد المواد البترولية ممكن تنزل للنص لو تم تحويل أكبر عدد من العربيات للغاز الطبيعي.

أما بالنسبة للصناعات التقيلة كلها، فبتستهلك 0.3 مليار قدم مكعب غاز يوميا، والتكرير والأسمدة والبتروكيماويات هي كمان بتستهلك حوالى 650 مليون قدم مكعب غاز كل يوم.

ونقدر نقول إن كمية الغاز الطبيعي المستخدمة في العربيات ومحطات الوقود بتُقدر بـ345 مليون قدم مكعب غاز يوميا، أما عن الكمية المستخدمة فى المنازل فهي 104 ملايين قدم مكعب، والكلام ده معناه إن قيمة الاستهلاك بتقدر بحوالى 5.4 مليار قدم مكعب غاز يومياً، وده بجانب لو في زيادات أو زيادة العرض والطلب لدخول الغاز فى المنازل.

ودلوقتي في تركيز كبير جدا على تحويل السيارات للغاز الطبيعى، وده بيقف وراه 3 عوامل أساسية، الأول: إن الغاز وقود اقتصادي من الدرجة الأولى بالمقارنة بالبنزين والسولار، عشان كده الحكومة شغالة دلوقتي على زيادة البنية التحتية من محطات الغاز الطبيعى على مستوى الجمهورية بواقع 1010 محطة لتموين السيارات بالغاز الطبيعى.

كمان في توجه للتحويل للأخضر، يعني نكافح التلوث ونقلل الانبعاثات الكربونية، ضيف على كده إن قيمة استخدام الغاز الطبيعي مقارنة بالسولار وبالنسبة للبنزين، هتوفر من نواتج عوادم الكربون والانبعاثات الكربونية اللي بيصل متوسطها في السنة لحوالى 40.2 مليون طن من الكربون.

عشان كده، الحكومة عملت حافز أخضر لتخريد السيارات القديمة، ومستمرة فى عملية تحويل السيارات، خاصة أنها نفذت البنية التحتية الخاصة بيها بشكل كامل.

كمان، شركات إنتاج السيارات اللي بيتم تصنيعها، زي (بى واى دى ونيسان) أو بقية الشركات التانية، فدلوقتي بيتم تصنيع العربية عشان تكون مؤهلة لاستخدام الغاز.

ضيف على ده، إن الحكومة عملت مبادرة نحويل نحو 1.5 مليون سيارة للعمل بالغاز الطبيعي خلال السنة دي، والخطوة دي مهمة جداً ولها مكاسب كثيرة، أولها إن التحويل بيحافظ على البيئة وبيقلل من الانبعاثات الكربونية لأن الغاز أقل تلويثاً، وده بيتوافق مع التزام الدولة وفقاً لمؤتمر المناخ COP27 بتقليل الانبعاثات الكربونية فى قمة المناخ حتى عام 2030، كمان ببعتبر الأوبشن ده من الحلول اللي بتتبناها مصر لتحقيق التنمية المستدامة.

عشان كده، متوقع في الفترة الجاية، يزيد الإنتاج المحلي لمصر من الغاز الطبيعى، خاصة بعد حصول الشركات الأجنبية العاملة في البحث والاستكشاف على مستحقاتها بانتظام، ده بالإضافة لاستمرار عمليات البحث والتنقيب والتطوير فى حقل ظهر، ومناطق تانية بشمال الصحراء الغربية، عشان نزود الإنتاج المحلى من الغاز للوصول للاكتفاء الذاتى.