يا ترى لو عندك شهادات إدخار في البنوك وعايز تجددها تعمل إيه؟، هل البنوك المصرية بتديك أوبشن إنك تجدد تلقائي من غير مشوار للبنك ولا في إجراءات مختلفة في 2025، طب هل متاح إنك تغير من شهادة لشهادة تانية في حالة إن الفايدة على الأخيرة أكتر من الأولى، وإيه هي أفضل الشهادات في سوق الأوعية الإدخارية دلوقتي.

دلوقتي، كتير من المواطنين خاصة أصحاب الشهادات، بيدروا على الأنواع الجديدة من الشهادات اللي فايدتها مرتفعة، عشان يحققوا أكبر مكاسب لهم في 2025، ويزودوا فلوسهم.

ونقدر نقولك إن أفضل الشهادات الموجودة في السوق دلوقتي، هي الشهادة اللي الفايدة بتاعتها بتسجل 23.5% سنويا، وبيتصرف العائد بتاعها شهريا.

كمان، من أفضل الشهادات ربحية في 2025، هي الشهادة اللي بتوصل نسبة الفايدة عليها ل 27% سنويا، وبيتصرف العائد بتاعها سنويا.

طب يا ترى، لو عندك شهادة من السنة اللي فاتت أو من سنين قبلها، تجددها إزاي؟

بص يا سيدي، في طرق كتير لتجديد الشهادات اللي فايدتها مرتفعة، خاصة الشهادتين اللي قولنا لك عليهم، واللي بيطرحهم بنك مصر والبنك الأهلي.

وبتصدر الشهادات اللي فايدتها عالية  بفئات 1000 جنيه ومضاعفاتها، وكمان هي متاحة للمصريين وللأجانب، وبتوصل مدة الشهادتين سنة واحدة بس، وماينفعش تتجدد بشكل تلقائي، لازم لها حبة إجراءات كده.

ومن أهم مزايا الشهادات دي، إن بيتم احتساب المدة اعتبارًا من اليوم التالي لشرائها، ومتاح إن حضرتك تاخد قرض بضمان الشهادات دي، ده بالإضافة لإمكانية إصدار بطاقات ائتمانية بضمانها، والمفاجأة إن متاح استرداد الشهادة دي بعد 6 شهور من تاريخ الشراء.

ولو حضرتك عايز تجدد شهاداتك، فلازم تشتريها من تاني من كل فروع بنك مصر أو البنك الأهلي، كمان ممكن تجددها من خلال الإنترنت البنكي، وعن طريق تطبيق الموبيل البنكي، وكمان عن طريق ماكينات الصراف الآلي ATM.

وبالأرقام كده، سجلت استحقاقات الشهادات مرتفعة الفايدة وهي شهادة ال 23.5% وال 27%، حوالي 1.3 تريليون جنيه في 2024، وتحديدا البنك الأهلي المصري، حقق مبيعات الشهادات اللي فايدتها عالية بقيمة 888 مليار جنيه، أما بنك مصر فنصيبه من مبيعات الشهادات دي كانت 412 مليار جنيه.

فلو عايز تجدد شهادتك.. ماتنساش تعمل اللي قولنا لك عليه.