سر صمود الجنيه قدام لدولار والعملات الأجنبية التانية؟ وإزاى بيقدم أفضل أداء لعملات الدول الناشئة امام العملة الأمريكية؟ وليه فيه توقعات قوية باسترداد العملة المصرية لجزء كبير من قيمتها فى 2025؟ 

في الفترة الأخيرة الجنيه المصري واجه تحديات كبيرة قدام الدولار والعملات الأجنبية التانية.. لكن رغم الضغوط دي فيه توقعات إن الجنيه ممكن يستعيد جزء كبير من قيمته في 2025.

طب إيه سر صمود الجنيه المصري؟

رغم التحديات الاقتصادية اللي بتواجهها مصر.. الجنيه المصري أظهر مرونة ملحوظة قدام الدولار.. ده بيرجع لعدة عوامل منها السياسات النقدية.. وده لأن البنك المركزي خد إجراءات للحفاظ على استقرار العملة زي رفع أسعار الفايدة للحد من التضخم.

كمان الاحتياطي النقدي.. مصر حافظت على مستوى جيد من الاحتياطي النقدي الأجنبي، وده ساعد في دعم الجنيه.. ومش بس كده  الحكومة اشتغلت على تنويع مصادر الدخل زي الاستثمار في البنية التحتية والسياحة.. وده قلل الضغط على العملة المحلية.

طب وبالنسبة لأداء الجنيه المصري مقارنة بعملات الدول الناشئة.. إيه الأخبار؟

في 2024 كتير من عملات الدول الناشئة شهدت تراجع كبير قدام الدولار بسبب الأزمات الاقتصادية العالمية.. لكن الجنيه المصري قدر يحافظ على استقراره النسبي.. وده يعتبر أداء أفضل مقارنة بعملات تانية.

وايه توقعات 2025 لسعر الجنيه ؟

الخبراء قدموا سيناريوهات مختلفة لسعر الجنيه قدام الدولار في 2025 السيناريو المتفائل بيقول لو الحكومة نفذت سياسات نقدية ومالية فعّالة ممكن الدولار يستقر عند ما بين 52 الى 54 جنيه.. ولو الإصلاحات استمرت السعر ممكن يوصل لـ50-51 جنيه في 2026.. ده هيحصل لو فيه توازن بين العرض والطلب على الدولار وده هيقلل التضخم.

وخلى بالك التضخم في مصر حاليًا حوالي 25% وما نزلش عن 20% من 2022.. الخبراء بيتوقعوا إنه يقل لـ16% بنهاية 2025 وده هيحصل لو الاقتصاد استقر والسياسات النقدية كانت فعّالة.

المبشر فى الموضوع ان معظم التقارير الدولية بتتكلم عن استقرار كبير فى سوق صرف العملات الجنبية فى مصر خلال العام الحالى وان مع تواصل تدفقات الدولار الدنيا هتظبط والجنيه ممكن يقدم أداء أفضل كمان من اللى قدموا فى 2024 وخد بالك انت عندك مصادر عملة صعبة بدأت تتحسن وطبعا أهمها السياحة وتحويلات المصريين العاملين فى الخارج وكمان الصادرات المصرية سجلت ارقام غير مسبوقة وده انعكس بشكل واضح جدا على التزام مصر بسداد الالتزامات الخارجية وكمان الاحتياطي النقدي من العملات الأجنبية زاد بشكل ملحوظ فى البنك المركزي.

خلاصة الكلام رغم التحديات اللي واجهها الجنيه المصري قدام الدولار والعملات الأجنبية التانية اللى انه قدر يصمد فيه توقعات إنه يستعيد جزء من قيمته في 2025. ده هيعتمد على السياسات الاقتصادية والإصلاحات اللي هتتعمل. المهم إننا نكون مستعدين وندير فلوسنا بحكمة في الفترة الجاية.