هي كل الدولارات اللي دخلت البدل بتروح فين.. وايه حكاية ال26 مليار دولار اللي دخلت مصر في 3 شهور.. والمؤشرات دي بتقول علي الاقتصاد المصري.

معروف من سنين طويلة إن مصر بتعتمد في مواردها الدولارية على 5 موارد اساسية من النقد الأجنبي وهي تحويلات المصريين العاملين بالخارج والسياحة والصادرات والاستثمار الأجنبي المباشر وإيرادات قناة السويس ورغم تنوع الموارد الدولارية دي لكن كل قطاع منها كام بيبقي فيه مشكلة مختلفة وفيه عوامل بتأثر في واحد فيها يعني التوتر في المنطقة بيأثر على السياحة وقناة السويس مثلا والاستثمار المباشر بيتأثر بحاجات تانية زي الاستقرار المالي وأسعار الفايدة على سبيل المثال لكن مكانش فيه خطط لتطوير كل قطاع فيهم بالشكل المطلوب لغاية ما تولي الرئيس السيسي المسؤولية وبقي فيه خطط طموحة جدا لمضاعفة الإيرادات من كل القطاعات اللي بتجيب عملة صعبة وتعظيم العائد منها.

شفنا القفزات في كل قطاع من القطاعات الخمسة المسؤولة عن توفير النقد الأجنبي للبلد وزي إيرادات السياحة اللي وصلت لحوالي 15 مليار دولار والتصدير اللي وصل ل40 مليار دولار وتحويلات المصريين اللي قفزت لمستوى تاريخي ب 24 مليار دولار في 10 شهور .. ودا غير الأرقام الضخمة اللي دخلت مصر من الاستثمارات المباشرة وكفاية نقول صفقة رأس الحكمة واللي دخلت 35 مليار دولار للبلد وقناة السويس رغم الأزمات اللي مرت بيها هتفضل مورد دولاري مهم والدولة عملت فيها مشروعات ضخمة خلتها تحقق نتائج وأرقام وإيرادات تاريخية قبل اندلاع الأحداث في المنطقة وتأثر حركة التجارة والملاحة البحرية.

وبلغة الأرقام الرسمية ارتفعت حصيلة مصر من تدفقات النقد الأجنبي الرسمية بنسبة 17% على أساس سنوي خلال الربع الأول من العام المالي الجاري 2024-2025  يعني في الفترة من (يوليو إلى سبتمبر 2024)، وزي ما احنا عارفين إن العام المالي في مصر بيبدأ من أول يوليو وينتهي آخر يونيو من العام التالي.

تقرير أداء ميزان المدفوعات الصادر للبنك المركزي كشف عن ارتفاع حصيلة مصر من النقد الأجنبي من 5 مصادر رسمية إلى  25.877 مليار دولار خلال الربع الأول من العام المالي الحالي مقارنة بـ 22 مليار دولار بنفس الفترة من العام المالي الماضي وخلي بالك الزيادة في كل التدفقات دي جت في وقت صعب جدا والمنطقة كلها مولعة وفيها صراعات شديدة وغير كمان إن الأرقام دي اتحققت وقناة السويس كان فيها أزمة ورغم كده مصر قدرت تعبر الصعب وكمان تحقق طفرات اقتصادية كبيرة في النقد الأجنبي.

الأرقام بتقول بردوا أن تحويلات المصريين وصلت في ال3 شهور الاول من السنة المالية 8.326 مليار دولار مقابل 4.516 مليار دولار بنسبة نمو 84% مرة واحدة .. و ارتفعت حصيلة الصادرات في نفس الفترة إلى 9.1 مليار دولار بالربع الأول من العام المالي الحالي مقابل  8.326 مليار دولار في السنة اللي قبلها.

وفي قطاع السياحة  زادت الإيرادات 8.2% وسجلت 4.815 مليار دولار بالربع الأول من العام المالي مقارنة بـ 4.451 مليار دولار بنفس الفترة .. وفي نفس الوقت  ارتفعت قيمة الاستثمار الأجنبي المباشر الي  2.717 مليار دولار ..امت قناة السويس فسجلت تراجع طبعا في المجمل وحققت 931 مليون دولار بالربع الأول من العام المالي الحالي مقابل نحو 2.399 مليار دولار بنفس الفترة في السنة اللي قبلها.

ليه قلنا الأرقام دي كلها.. عشان حضرتك تعرف إن كل مؤشرات الاقتصاد بتزيد وبتتحسن رغم الأزمات الصعبة اللي مرت بيها مصر .. ولو عاوز تعرف المليارات دي بتروح فيه فنحب نقولك أنها بتروح في سد احتياجات الدولة من الاستيراد السلع الأساسية وفي سداد الديون وفي عمل المشروعات الاستثمارية واللي بيزيد بيتحط في الاحتياطي النقدي.