يا ترى إيه اللي هيحصل لما ميناء الإسكندرية يتحوّل لمنطقة لوجيستية عالمية؟ وإزاي دخول موانئ أبوظبي في اللعبة دي هيغير قواعد المنافسة في التجارة البحرية؟ وليه أصلاً كل العالم دلوقتي بيبص على مصر كـ"نقطة عبور ذهبية" للبضائع؟
من ساعات تم الاعلان عن توقيع مذكرة تفاهم جديدة بين مصر ومجموعة موانئ أبوظبي لتطوير وتنمية منطقة لوجيستية بميناء الإسكندرية.. وتنفيذ مشروع مش عادي بيجمع بين واحدة من أكبر المجموعات اللوجيستية في المنطقة وأكبر ميناء في مصر.
الاتفاقية دي خطوة واقعية ضمن خطة وزارة النقل المصرية لتحويل مصر إلى مركز إقليمي للنقل البحري واللوجستيات… وده مش كلام شعارات خليني أقولك التفاصيل.. المنطقة اللوجيستية الجديدة في ميناء الإسكندرية مساحتها كبيرة جدا المرحلة الأولى مثلا 273 فدان والمرحلة التانية 600 فدان.. يعني بنتكلم عن مساحة ضخمة جدًا كأنها "مدينة لوجيستية" كاملة بتخدم حركة التجارة في البحر المتوسط وبتربط بين آسيا وأوروبا.
طب المشروع هيشمل إيه؟
تقدر تقول إنه هيكون مركز متكامل بيجمع بين خدمات التخزين والاستيراد والتصدير.. البضائع هتدخل وتتخزن بأمان ومن هنا يتم توزيعها داخل مصر أو إعادة تصديرها للخارج.
مش بس خدمات التخزين فيه كمان التعبئة والتغليف.. وده لأن المنتجات الزراعية والصناعات التحويلية الصغيرة هتتجهز هنا قبل ما تطلع الأسواق.
وكمان صناعات القيمة المضافة زي تصنيع الحاويات وتجهيز الزيوت المستوردة وكمان الصناعات الورقية.. وكل المنتجات الواردة أو المصدّرة هتخضع لاختبارات صارمة عشان تضمن مطابقتها للمعايير العالمية.. وده كله تحت إشراف مباشر من وزارة النقل اللي بتشتغل على رؤية واضحة لإنشاء 32 ميناء جاف ومنطقة لوجيستية على مستوى الجمهورية.
طب ليه موانئ أبوظبي تحديدًا؟
فيه أسباب كتير خلت مصر تختار مجموعة موانئ أبوظبي كشريك استراتيجي منها طبعا الخبرة الدولية.. موانئ أبوظبي عندها سجل ضخم في إدارة وتشغيل موانئ عالمية سواء في الشرق الأوسط أو خارج المنطقة وقدروا يحققوا نجاحات لافتة.
وكمان امتلاكها التكنولوجيا الحديثة.. المجموعة معروفة باستخدامها لأحدث التقنيات في النقل البحري والخدمات اللوجيستية، وده بيوفر كفاءة أعلى وتكاليف أقل… بالاضافة طبعا للثقة والعلاقات الاستراتيجية.. الإمارات ومصر بيجمعهم شراكة قوية في مشاريع كتير وده بيخلق مناخ استثماري آمن لأي تعاون جديد.
وايه الميزة التنافسية لميناء الإسكندرية؟
الميناء ده مش عادي.. هو جزء من الممر اللوجيستي السخنة - الإسكندرية الدولي اللي هيكون العمود الفقري للتجارة بين البحرين الأحمر والمتوسط..و ده معناه تسهيل حركة البضائع لأن المنتجات اللي جاية من شرق آسيا هتوصل لأوروبا أسرع و الميناء هيكون متصل بمحطة تبادلية في العامرية بتربط بخطوط السكة الحديد زي المناشي-الاتحاد-القباري، وكمان بالقطار الكهربائي السريع.. والتوصيل السريع والتكامل ده بيقلل التكلفة والوقت وبيزود من تنافسية المنتجات المصرية عالميا.
ومصر هتستفاد إيه؟
فيه فوايد كتير زي زيادة الاستثمارات الأجنبية.. لما الإمارات تدخل في مشروع زي ده.. ده بيشجع شركات عالمية تانية تدخل السوق المصري.. وهتخلق فرص عمل ضخمة لأن المنطقة هتحتاج آلاف العمال والموظفين في كل المجالات من التصنيع للنقل والإدارة.. والصناعات المرتبطة بالمشروع هتزود الناتج المحلي، وهتفتح أسواق جديدة للصادرات والموقع الجغرافي الفريد لمصر هيكون مستغل بالكامل.
الخلاصة إحنا قدام خطوة جديدة بترسم ملامح مستقبل الاقتصاد المصري. ميناء الإسكندرية مش بس هيكون بوابة البحر المتوسط، لكن هيكون نقطة انطلاق لصناعات جديدة واستثمارات ضخم.
0 تعليق