السبت 25 يناير 2025 | 09:56 صباحاً

الإعلامي عمرو أديب

أكد الإعلامي عمرو أديب، مُقدّم برنامج "الحكاية"، أن الدولة يجب أن تولي اهتماما أكبر بالإنفاق على المواطن وزيادة أجره لمواجهة الأوضاع الاقتصادية الحالية.

وقال أديب، خلال تقديم برنامجه "الحكاية"، المذاع على قناة "إم بي سي مصر" الفضائية: "حد الكفاف للمواطن اللي عنده أسرة من 10-15 ألف جنيه يبقي عايش كويس، وهذا الأمر لن يتأتى إلا لما يكون في شخصيات في الإدارة المصرية هذه هي سياستها أنا موجود عشان المواطن حياته تكون أفضل وأنا سأتوقف تماما عن الإنفاق الحكومي".

وأضاف أديب: "لازم يكون في قرار جريء بقى وكل ده يتوقف قليلا، والناس خلاص وقفت، وبقى عندها أمل أنه خلاص يبتدي يشوف أشياء ملموسة وأن الناس تشعر أن الدولة واقفة جنيها".

وتابع أديب: "الناس مش قادرة تستنى لما المونوريل يخلص الشعوب بتفكر بالدخل مش بالعقل، المونوريل عظيم وشي هايل ولكن المواطن عايز الفلوس".

وواصل أديب: "في طريقتين للتغيير في المجتمع في التغيير بالإصلاح وفي التغيير اللي عايزينه، من برة واللي هو التغيير بالهدم وأنا مازلت مقتنع أن المجتمع محتاج للتغيير بالإصلاح بشكل كبير".

وأوضح أديب: "توقف قليلا وأنظر إلى الناس والناس اللي أنت بتشوفها حواليك دي في ناس تانية في أماكن أخرى، أنت مبتشوفهاش في ناس تعبانة جدا ويجب النظر إليها بشكل كبير".

وأكمل أديب: "توقف عامين أو تلاتة واهتم بالناس فقط أعطي الناس فقط أنت بتتكلم عن 27-28% تضخم".

وذكر أديب: "ترامب بردو بيعمل إيه؟ بيشطب حاجات كان بيتصرف عليه، وقاله حطهالي هنا وقالك لو أنت مش بتنتج أنا هفرض عليك ضرايب".

واختتم عمرو أديب: "مصر دي عربية كبيرة راكب فيها 120 مليون وعندهم أمل أن تصل إلى نهاية الطريق ولازم يشوفوا الضوء في نهاية الطريق لو سمحتوا إحنا مشينا بطريقة اقتصادية معينة خلال 10-12 سنة آن الأوان للصرف على الناس".