يا ترى إيه هو سر تراجع أسعار الدهب العالمية، هل الموضوع له علاقة بقرارات جديدة من رئيس أمريكا دونالد ترامب وعودة هيمنة الدولار ولا هي مسألة العرض والطلب، طب هل ممكن المعدن الأصفر يباغت الجميع ويرجع يرتفع من تاني ولا لأ، وايه هو تأثير الكلام ده على سوق الصاغة في مصر.

في الساعات الأخيرة، أسعار الدهب العالمية اتراجعت، وده حصل بعد ما سجلت أعلى مستوى لها في آخر 3 أشهر، والسبب في كده هو استعادة الدولار استقراره وقوته من جديد، خاصة بعد تنصيب الرئيس الأمريكي الجديد دونالد ترامب، فمع زيادة هيمنة الدولار نسبيا فالدهب نزل لأن العلاقة بينهم عكسية، لو واحد فيه ارتفع التاني بينزل فورا.

ولكن رغم هبوط الدهب في الأيام الأخيرة، إلا أن الأسواق العالمية لسه بتترقب قرارات دونالد ترامب، اللي قال إنها هترفع الدولار للسما من تاني.

وبسبب التصريحات دي، فشهد سعر الدهب العالمية انخفاض، واتراجع سعر الأونصة بنسبة 0.3%، عشان تسجل أدنى مستوى عند 2746 دولار ، بعد ما كانت ب 2755 دولار، وحاليا بيتداول سعر الدهب عند 2747 دولار.

وبيحصل التراجع ده بعد ما سجل الدهب أعلى مستوى له من حوالي 3 أشهر عند 2763 دولار، عشان يقترب من أكثر من قمته التاريخية عند 2790 دولار، لكنه فعليا كان واجه مقاومة عند المستوى 2760 دولار للأونصة، واللي ساعدت على بدء عمليات البيع لجني الأرباح.

ونقدر نقول، إن تراجع أسعار الدهب سببها هو سياسية التصحيح الأمريكية، خاصة بعد عودة الدولار للتماسك من جديد مقابل العملات الرئيسية، وتوقفه عن الهبوط، ورغم كده، فالتوقعات الحالية لأسعار الهب على المدى القصير، إيجابية جدا.

وكان دونالد ترامب، اقترح فرض رسوم جمركية بنحو 25% على الواردات من المكسيك وكندا، ورسوم تانية بنسبة 10% على الصين، اعتبارا من فبراير الجاي، ومش بس كده، ده كمان وعد بفرض رسوم على الواردات الأوروبية، والقرارات دي كانت سبب في استمرار الطلب على الدهب كملاذ آمن، وده بسبب التخوفات من تأثيرها على حركة التجارة العالمية.

ولكن في نفس الوقت القرارت دي دعمت الدولار بشكل كويس، ونجح في إنه يحقق  الاستفادة من ارتفاع التعريفات الجمركية لأنها بتخفض فجوة العجز التجاري وبتقوي الدولار وتسنده بشكل كويس جدا.

وطبعا بعد انخفاض أسعار الدهب العالمية، فكل الأسواق المحلية اتأثرت بيها، وبالفعل هبط سعر المعدن الأصفر في دول كتير ومن بينها مصر، وسجل عيار 24 حولي 4320 جنيه، وعيار 21 سجل 3780 جنيه، أما سعر جرام الدهب عيار 18، فوصل ل 3240 جنيه، والجنيه الدهب نحو 30240 جنيه.

أما بالنسبة للأسعار المتوقعة للدهب، فالمختصين بيتوقعوا إنه هيشهد انخفاض خلال الفترة الجاية، فلو حضرتك ناوي تشتري فاستعد كويس من دلوقتي.