القطاع السياحي كله متفائل حاليا والتوقعات كبيرة جدا بتحقيق رقم قياسي جديد بعدد السائحين الوافدين.. ياتري مصر متوقعه تحقق كام سائح في 2025.. ومصر مستهدفة توصل لكام من ايرادات قطاع السياحة.

15 شهر كاملة السياحة المصرية عانت فيهم بسبب التوترات الكبيرة اللي كانت موجودة في منطقة الشرق الاوسط، والفترة دي كلها اثرت علي الارقام اللي كانت ممكن السياحة المصرية تحققها والايرادات اللي كانت هتدخل لخزينة الدولة المصرية، وكل التوقعات كانت بتقول أن مصر هتعدي 17 مليون سائح خلال 2024 لولا التوترات اللي كانت موجودة علي مدار الفترة اللي فاتت.

الاخبار السعيدة اللي حصلت في الكام يوم اللي فاتوا، واللي كل الناس فرحت بيها سواء كان لهم دخل بالأحداث أو ملهوش دخل، والأخبار دي هتغير الخريطة الاقتصادية في منطقة الشرق الاوسط بشكل كامل وفي مصر بشكل خاصة، خصوصا أن مصر بتعد من أكثر الدول اللي اغلب مواردها الاقتصادية اتاثر بشكل كبير.

طيب اية اللي حصل في قطاع السياحة بعد توقف التوترات في منطقة الشرق الأوسط ؟

بعد ما الأمور رجعت تهدي مرة تانية في منطقة الشرق الأوسط، اغلب شركات السياحة بدأت تخرج وتروج للسياحة المصرية في كل الأسواق السياحية المستهدفة خصوصا في دول أوروبا وأسيا وفعلا في اقبال كبير الشركات لاقياه من السائحين في كل دول العالم خصوصا بعد الاخبار اللي أعلنها الدكتور مصطفي مدبولي رئيس مجلس الوزراء عن الإفتتاح الرسمي للمتحف المصري الكبير واللي كل الناس منتظراه حاليا علشان يشوفوا عدد كبير من القطع الآثرية اللي بتعرض لأول مرة زي المجموعة الكاملة للملك توت عنخ آمون واللي بتوصل عددها لأكثر من 5000 قطعة آثرية هتعرض بشكل كامل منذ لحظة اكتشافها في سنة 1922 في الاقصر واللي هتكون مصدر تشويق للزائرين في المتحف المصري الكبير لأنهم هيشوفوا حاجة بتظهر لأول مرة في التاريخ.

وزارة السياحة أعلنت أنها بتستهدف زيادة هتترواح من 15 إلي 20% في عدد السائحين اللي جايين لمصر، خصوصا أن معدل الزيارة اللي حصلت في اعداد السائحين اللي جايين مصر في 2024 وصل لـ5% بس وده بسبب الأحداث اللي كانت موجودة في منطقة الشرق الأوسط .