هو إيه اللي بيحصل في ملف الاستثمار في مصر دلوقتي وإيه حكاية الصفقات التقيلة اللي داخلة السوق المصري وإيه حكاية صفقة الـ5 مليار الكويتية في مصر.

زي ما احنا عارفين إنه من ساعة صفقة رأس الحكمة الاماراتية في مصر وهويس الاستثمارات العربية والأجنبية فتح على أخره في السوق المصري ودا تزامن مع قرار المركزي المصري بتحرير سعر الصرف وإصلاح التشوه في سوق الصرف وتعدد سعر الدولار وشفنا كام صفقة ضخمة في قطاعات اقتصادية وخاصة في مجال الطاقة النظيفة والصناعة والسياحة وغيرها وشفنا ارقام الاستثمارات اللي استقبلتها المناطق الصناعية في اقتصادية قناة السويس وفي الساحل الشمالي والبحر الأحمر.

طيب ايه الجديد في ملف الاستثمارات؟
شوف يا سيدي الكلام دلوقتي داخل الأوساط الاستثمارية والاقتصادية بتتكلم عن صفقة كويتيىة من العيار التقيل ودا بياكد الكلام اللي قلناه هنا من يومين في بانكير بخصوص الاستثمارات الكويتية الجديدة اللي جاية مصر وخاصة إن الكويت منتظرة زيارة الرئيس السيسي ليها والمرتقبة وقلنا إن الزيارة دي هتغير مجري العلاقات الاقتصادية مع الكويت.

وبخصوص الصفقة الجديدة قالت المصادرة إن مجموعة (بو خمسين) القابضة الكويتية بتخطط للاستحواذ على أكبر شركة قابضة بقطاع الاستثمار السياحي والفندقي بمصر بقيمة استثمار 4.9 مليار دولار يعني بنتكلم في 5 مليار دولار تقريبا.

وحسب المعلومات المجموعة الكويتية نازية ترفع استثماراتها بقطاع السياحة والفنادق في مصر بعد الطفرة اللي حصلت في القطاع المصري والمشروعات الجديدة اللي هتفتتحها مصر الفترة الجاية وخطة الوصول ل30 مليون سائح سنويا... وقالت المصادر إن مجموعة بوخمسين الكويتية قررت بشكل جدي  الاستحواذ على أكبر شركة بمصر والشرق الأوسط المالكة لعلامات فندقية عالمية شهيرة بمدينة نصر، والمالكة لأشهر المولات  التجارية  بمصر وعدد من المبانى الإدارية المؤجرة لشركات عالمية وتعد من أعرق الشركات بمصر.

المجموعة الكويتية بتملك محفظة أراضي قابلة للتطوير بأهم المناطق السياحة بشرم الشيخ والساحل الشمالى قابلة للتنمية والتطوير ودا بيأكد نيتها التوسع في السوق المصري للأسباب اللي قلنا عليها وحسب المصادر الصفقة دي لو تمت بنجاح هتكون من أكبر عمليات الاستحواذ  بالقطاع السياحي في مصر.

المصادر أكدت كمان إن الصفقة المنتظرة هتفتح شهية الشركات العالمية المتخصصة في الاستثمار السياحي للدخول في السوق المصري الواعد مع زيادة الايرادات والتدفقات السياحية  وفيه شركات عالمية قررت أو أعلنت نيتها الاستثمار المباشر بقطاع السياحة في ظل دعم حكومي وارتفاع العائدات ومع حالة النقص فى الطاقة الاستيعابية للغرف الفندقية وحاجة قطاع السياحة للوصول إلى 500 ألف غرفة فندقية لاستيعاب 30 مليون سائح ومع الخطط الطموحة للحكومة في القطاع دا وتحقيق ايراداتات تاريخية الشركات العالمية مش هتلاقي فرصة أنسب من دي عشان تعمل مشروعات جديدة في مصر وتضمن موطيء قدم ليها في السوق السياحي الأول في المنطقة.